Almatyda bıyl 300 shaqyrymnan astam elektr jelileri aýystyrylady
ALMATY. KAZINFORM – Almatynyń ınjenerlik ınfraqurylymyn jańǵyrtý boıynsha 2026 jylǵa arnalǵan basym baǵyttar bekitildi.
Almaty ákimdiginiń málimetinshe, baǵdarlama aıasynda 2026 jyly 379 shaqyrym elektr jelisin qaıta jańartý josparlanyp otyr. Onyń ishinde 269 shaqyrymy «Alataý Jaryq Kompanııasy» AQ-nyń basqarýyndaǵy jeliler. Sonymen qatar 14 jańa jobany iske qosý jáne 8 ótpeli jobany jalǵastyrý kózdelgen.
– Basymdyq jańa qosalqy stantsııalar men taratý pýnktterin salýǵa, sondaı-aq áýe jelileriniń bir bóligin kabeldik formatqa kóshirýge beriledi. Bul sharalar energııa júıesiniń turaqtylyǵyn arttyryp, qalanyń qoldanystaǵy jáne jańa aýdandaryn úzdiksiz elektrmen qamtýǵa múmkindik beredi, - dep habarlady ákimdikten.
Negizgi jobalar qatarynda Jetisý aýdanyndaǵy «Kırpıchnaıa» qosalqy stantsııasynyń qurylysy, «Nur-Alataý» shaǵyn aýdanyn elektrmen jabdyqtaý, sondaı-aq Bostandyq, Naýryzbaı, Alataý jáne Medeý aýdandaryndaǵy jelilerdi qaıta jańartý jumystary bar.
Odan bólek qyzmet kórsetýdiń jedeldigin arttyrý jáne apattardy joıý ýaqytyn qysqartý úshin jańa aýdandyq paıdalaný bólimshesin qurý josparlanyp otyr.
Eske salaıyq, buǵan deıin Almaty elektr stantsııalary qosymsha qyzmetpen energııany mindettep satqany úshin tekserilip jatqanyn jazǵanbyz.