Almatyda bıyl 300-den astam jańa «Sergek» kesheni ornatylady

ALMATY. KAZINFORM — Almatyda jol qaýipsizdigin baqylaıtyn kameralar kóbeıip keledi. 

Naýryz aıynyń basynda almatylyqtar qala kóshelerinde jańa kameralar ornatylyp jatqanyn baıqap, bul týraly pikirlerin áleýmettik jelide belsendi bólisti. Mysaly, jelide jarııalanǵan beınejazbalardyń birinde — Tóle bı kóshesinde jańa kameralardyń kóptigi kórsetilgen. 

Almaty qalasynyń polıtsııa departamenti agenttik saýalyna bergen jaýabynda jańa beınebaqylaý júıeleriniń jumysyna qatysty túsinik berdi. Polıtsııa qazir qala kóshelerinde kameranyń ózge túrleri emes, tek «Sergek» apparattyq-baǵdarlamalyq keshenderi ornatylyp jatqanyn atap ótti.

Bıyl 1 naýryzdan bastap jol qaýipsizdigin baqylaıtyn 1 myń kameranyń qasyna 200 «Sergek» ornatylǵan. Sáýir aıyna deıin 750 kameranyń qasyna taǵy 150 aqyldy beınebaqylaý júıesi qoıylady.

— 2024-2028 jyldarǵa arnalǵan jol qaýipsizdigin qamtamasyz etý tujyrymdamasyn iske asyrý jónindegi is-qımyl josparyn oryndaý úshin 2026 jyly 1750 kameraǵa qosymsha 350 «Sergek» kesheni ornatylyp jatyr. Olar qaladaǵy barlyq kólik qozǵalysyn baqylaıdy, sondaı-aq jol-kólik erejesi boıynsha zań buzýdy tirkeıdi, — dep túsindirdi departamentten.

Eske salaıyq, 12 naýryzdan bastap Ákimshilik quqyq buzýshylyq týraly kodeksiniń 31-babyna Qazaqstan Respýblıkasynyń Tsıfrlyq kodeksi aıasynda qabyldanǵan ózgerister kúshine endi. 

Ol boıynsha kameralar jol erejesin buzýdyń jańa derekterin tirkeı bastady. Atap aıtqanda, kólik basqaryp otyrǵanda telefon paıdalaný jáne qaýipsizdik beldigin taqpaý, sondaı-aq mindetti saqtandyrý polısiniń bolmaýy, tehnıkalyq baıqaýdyń merziminiń ótýi syndy quqyq buzýshylyqtar avtomatty túrde tirkelip jatyr. Bul da qala kóshelerinde «Sergek» kesheniniń kóbeıýine áser etkeni bolýy tıis.

Buǵan deıin Almaty oblysynda ortasha jyldamdyq kameralary ornatylǵanyn jazǵanbyz.