Almatyda bıyl 16 jylý qazandyǵy jańartylady
ALMATY. KAZINFORM — Darhan Satybaldy aldaǵy jylytý maýsymyna daıyndyq jóninde jumys keńesin ótkizdi.
Jıyn barysynda qala basqarmalary, kommýnaldyq qyzmetter men merdiger uıymdardyń basshylary atqarylǵan jumystar men ınjenerlik ınfraqurylym nysandaryn jańǵyrtý jáne salý jóninde esep berdi.
Bıyl 39 shaqyrym jylý, 238 shaqyrym elektr, 260 shaqyrym sý qubyryn jáne 34,7 shaqyrym gaz jelisin qaıta jańartý josparda. Sonymen qatar, 2025 jyly 347 shaqyrym sý jáne káriz jelilerin salý jáne jańǵyrtý, sondaı-aq, 69 qazandyqty jóndeý jáne 16 qazandyqty jańǵyrtý kózdelgen. Bul jumystar aıasynda 12 qazan, 47 mehanızm, 11 syıymdylyq jáne gaz jabdyqtary aýystyrylady.
Keńeste ınjenerlik jelilerdiń 56,1%, elektrmen jabdyqtaýdyń 64,5%, sýmen qamtamasyz etýdiń 51,73%, gazdyń 36 paıyzy tozǵany aıtyldy.
Qala ákimi ınjenerlik ınfraqurylymdy jańartý boıynsha júıeli jumystyń mańyzdylyǵyn atap ótti.
— Men kún saıyn jylytý maýsymyna daıyndyq barysy týraly málimet alyp otyramyn. Eger qandaı da bir kesheýildeý bolsa, dereý shara qoldanamyz. Magıstraldyq jeliler men energetıkalyq jobalardy jańǵyrtý boıynsha kelisimsharttar jasalǵan, qarjylandyrý qamtamasyz etilgen, jumys júrgizilip jatyr. Baqylaýdy bosańsytýǵa bolmaıdy, ásirese, turǵyn sektor men áleýmettik nysandardyń daıyndyǵyna erekshe nazar aýdarý qajet, – dedi Darhan Satybaldy.
Keńesten keıin Darhan Satybaldy qalanyń birqatar mańyzdy ınfraqurylymdyq nysanyn aralady. Qalanyń negizgi energııa kózderiniń biri – JEO-2-de ol energetıkalyq jáne qosalqy jabdyqtarǵa júrgizilip jatqan aýqymdy jóndeý jumystarymen tanysty.
Jańǵyrtý jobasy ekologııalyq jáne energetıkalyq turaqtylyqty arttyrýǵa baǵyttalǵan. Elektr qýatyn 557 MVt-qa, jylý qýatyn 952 Gkal/saǵ deıin arttyryp, zııandy zattar shyǵaryndylaryn 93%-ǵa, al kómirtek izi 38%-ǵa tómendetý kózdelip otyr.
– JEO-2-ni jańǵyrtý – eń mańyzdy mindetterdiń biri. Bul qalanyń ekologııalyq turaqtylyǵy men jaıly ómir súrý ortasyn qamtamasyz etetin strategııalyq joba. Ekologııalyq kórsetkishterdi jaqsartý Almatynyń damýyna qosylǵan mańyzdy úles, – dedi Darhan Satybaldy.
Qala ákimi «Orbıta» aýdandyq qazandyǵyn da baryp kórdi. Bul qazandyq ońtústik aýdandardy – Orbıta 1-4, Almagúl shaǵyn aýdanyn jáne Asqarov kóshesin jylý jáne ystyq sýmen qamtamasyz etedi. Munda kólemi 2000 tekshe metr úsh akkýmýlıatorlyq bak ornatyldy. Onyń ekeýi paıdalanýǵa berildi. Joba eń joǵary tutyný kezinde de jylý júktemesin teńestirýge jáne jylýmen qamtýdyń turaqtylyǵyn arttyrýǵa múmkindik beredi.
Bostandyq aýdanynda qala ákimi 1972 jyly paıdalanýǵa berilgen «Ońtústik» qazandyǵyn da kórdi. Qýaty 190 Gkal/saǵ bul qazandyq 356 kópqabatty turǵyn úı men 39 áleýmettik nysandy jylýmen qamtıdy. Qýatyn 290 Gkal/saǵ deıin arttyrý jobasy arqyly qalanyń ońtústik bóligindegi qosymsha 100 myńǵa jýyq turǵyndy ortalyqtandyrylǵan jylýmen qamtamasyz etý kózdelgen.
Jobada jańa qazandyq tsehynyń qurylysy, zamanaýı sýqyzdyrǵysh qazandyqtar men qosalqy jabdyqtardy – rezervýarlar, tazartý qurylǵylary jáne órt sóndirý júıesin ornatý qarastyrylǵan. Qala ákimi jobanyń merziminde oryndalýyn qamtamasyz etip, jylytý maýsymy bastalǵanǵa deıin barlyq daıyndyq jumysty aıaqtaýdy tapsyrdy.
Buqar Jyraý – Masanchı – Ǵabdýllın – Baıtursynov – Sátbaev kósheleri aýmaǵynda 1983 jyly paıdalanýǵa berilgen jylý trassasy qaıta jańǵyrtylyp jatyr. Bul jeli 220-dan astam nysandy – turǵyn úılerdi, mektepter men medıtsına mekemelerin jylýmen qamtamasyz etedi.
Bıyl 1,5 shaqyrym qubyr aýystyrylady. Bul jumystardyń eki jylǵa josparlanǵany jáne 2026 jyl aıaqtalady. Jańǵyrtý kezinde ystyq sý berý toqtatylmaıdy.
Jumys sapary qorytyndysy boıynsha Darhan Satybaldy jylytý maýsymy bastalǵanǵa deıin barlyq negizgi jumysty aıaqtaýdy, ásirese mektep, balabaqsha men aýrýhana syndy áleýmettik nysandarǵa erekshe nazar aýdarýdy tapsyrdy.
Qysqy maýsymǵa daıyndyqtyń sońǵy merzimi – 31 tamyz. Darhan Satybaldy jobalardyń sapasy men merziminiń oryndalýyna turaqty baqylaý bolatynyn jáne ınfraqurylymdy jańǵyrtý sharalary ákimdik qyzmetiniń basym baǵyty bolyp qala beretinin jetkizdi.
Osyǵan deıin Ónerkásip jáne qurylys mınıstrligi aldaǵy jylý maýsymyna daıyndyq bastalǵanyn málimdegen edi.