Almatyda bıyl 158 keli esirtki tárkilenip, 5 zerthana joıyldy
ALMATY. KAZINFORM — Almatyda esirtkige qarsy is-sharalar aıasynda 158 kg esirtki tárkilenip, 5 esirtki zerthanasy joıylǵan. Bul týraly óńirlik kommýnıkatsııalar qyzmetiniń brıfınginde Almaty qalasy PD Esirtki qylmysyna qarsy is qımyl basqarmasynyń asa mańyzdy ister jónindegi aǵa jedel ýákili Dáýren Kóbeev málimdedi.
Onyń aıtýynsha, 2024 jyldyń 5 aıynda Almaty aýmaǵynda polıtsııa esirtki quraldarynyń zańsyz aınalymyna baılanysty 264 quqyq buzýshylyqty anyqtaǵan.
Esirtki satýdyń 116 faktisiniń joly kesildi.
158 kılogramnan astam esirtki zaty tárkilenip, zańsyz aınalymǵa jiberilmedi.
«Búgingi tańda jahandyq problemanyń biri — sıntetıkalyq preparattar men olardy óndirýge arnalǵan zerthanalar bolyp otyr. Almaty polıtsııasy júrgizgen jedel jáne arnaıy is-sharalardyń nátıjesinde 5 esirtki laboratorııasy joıyldy», — dedi Dáýren Kóbeev.
Brıfıng barysynda jyl basynan beri Esirtki qylmysyna qarsy is-qımyl basqarmasynyń qyzmetkerleri 41 esirtki qoıyp ketýshini ustaǵany aıtyldy.
Sondaı-aq esirtki taratatyn jáne jarnamalaıtyn 337 ınternet-resýrs anyqtalyp, buǵattalǵan.
Dáýren Kóbeev «Narkostop» qozǵalysynyń eriktilerimen birlesip, esirtki týraly aqparatty qamtıtyn 3 myń 651 graffıtı joıylǵanyn aıtty.
Sondaı-aq ol Almaty polıtsııasy nashaqorlyqqa jáne esirtkiniń zańsyz aınalymyna qarsy halyqaralyq kúres kúni aıasynda esirtkige qarsy aılyq bastalǵanyn atap ótti.
