Almatyda bıyl 100 shaqyrym taý soqpaǵy abattandyrylady
ALMATY. KAZINFORM — Almatyda taý soqpaqtaryn abattandyrý qolǵa alyndy.
2025 jyly Almaty qalasy Týrızm basqarmasy uzyndyǵy 100 shaqyrymnan asatyn 10 jańa taý soqpaǵyn abattandyrýdy jáne kún panelderimen jabdyqtalǵan 3 kempıng aımaǵyn jasaýdy josparlap otyr.
— Buǵan qosa, Almatyda týrızmdi damytýdaǵy mańyzdy qadamdardyń biri retinde bıyl eki iri mádenı nysannyń — «Tselınnyı» zamanaýı mádenıet ortalyǵy men Almaty Museum of Arts kórkemóner murajaıynyń ashylýy josparlanǵan. Bul jobalar Almatyǵa jańa mádenı jáne týrıstik núkteler qosyp, qalanyń óńirdegi óner men mádenı is-sharalar ortalyǵy retindegi mártebesin nyǵaıtpaq, — dep habarlady ákimdikten.
Byltyr Almatyda 100 shaqyrym taý soqpaǵy abattandyrylyp jańa baǵyttar ashyldy.
Kóktóbede «Densaýlyq joly» dep atalatyn jańa jaıaý júrginshiler baǵyty paıda boldy. Bul — ashyq aspan astynda serýendep, belsendi demalýǵa arnalǵan abattandyrylǵan marshrýt. Uzyndyǵy 1,2 shaqyrym joldyń qurylysy 2023 jyly jeke ınvestıtsııalar esebinen bastalǵan. Baǵyt boıyna zamanaýı jaryqtandyrý, beınebaqylaý júıesi, oryndyqtar, qoqys jáshikteri men Almaty jáne taýǵa kórinis ashatyn alańdar ornatylyp, kelýshilerge jaıly jaǵdaı jasaldy.
Týrıster men qala turǵyndary úshin tartymdy oryndardyń biri — «Medeý» bógeti. Bul — bıik taýdaǵy ataýly sport kesheninen joǵary ornalasqan biregeı gıdrotehnıkalyq nysan. Abattandyrý aıasynda munda «Medeýge» panoramalyq kórinis beretin tórt jańa sholý alańy ornatylyp, panoramaǵa sholý jasaýǵa arnalǵan alty tegin bınokl qoıyldy. Qaýipsizdikti arttyrý maqsatynda qorshaýlar men jol tósenishteri jańartyldy. Sonymen qatar, sholý alańdary men bóget boıyna beınekameralar ornatyldy.
Budan bólek, jańa jaıaý júrginshi baǵyty ashyldy. «Jumbaq joldyń» uzyndyǵy 285 metr, kúnine 2 myńnan asa adam júrip óte alady. Bul jol týrıster arasynda tanymal Gorelnık vızıt-ortalyǵyna aparady.
2024 jyly qalaǵa 2,34 mln týrıst kelgen, onyń 686 myńy sheteldik, bul rekordtyq kórsetkish. Kóbine týrıster Reseı, Úndistan, Qytaı, AQSh jáne Túrkııadan kelgen.
Aıta ketelik bıyl Almatyǵa 750 myńǵa jýyq sheteldik týrıst keledi dep boljanyp otyr.