Almatyda bıyl 100 kóppáterli turǵyn úıge kúrdeli jóndeý júrgiziledi
ALMATY. KAZINFORM — 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda Almatyda turǵyn úı qoryn jańǵyrtý boıynsha jumystar qarqyndy jalǵasyp keledi.
Baǵdarlamanyń negizgi maqsaty — azamattar úshin qolaıly, qaýipsiz ári energııa tıimdi turǵyn úı ortasyn qurý.
Baǵdarlama birneshe mańyzdy baǵyttan turady:
— Kópqabatty úılerdi kúrdeli jóndeý: Shatyr aýystyrý, jertólelerdi jóndeý jáne ınjenerlik júıelerdi jańartý boıynsha turaqty jumystar júrgiziledi.
— Kommýnaldyq ınfraqurylymdy jańǵyrtý: Jylý, sý jáne káriz júıelerin jańartý úderisin ońtaılandyryp, kommýnaldyq júıelerdiń úzdiksiz jumysyn qamtamasyz etedi.
2024 jyly 100 kópqabatty turǵyn úıde kúrdeli jóndeý júrgizip, 100 jedelsaty jabdyqtaryn aýystyrý kózdelgen.
«Bıyl 100 kópqabatty úıde jóndeý jumystaryna kelisimsharttar jasaldy. Qazir 46 úıde jumys aıaqtaldy, 54 úıde jóndeý jumystary jalǵasyp jatyr. 45 úıde 87 jedelsaty aýystyrýǵa kelisimsharttar jasaldy. Búginde 3 úıde 4 jedelsaty jańartyldy. Qalǵan úılerde aýystyrý jumystary jalǵasýda», — dep atap ótti Almaty qalalyq kommýnaldyq ınfraqurylymdy damytý basqarmasy.
Aıta keteıik, 2011 jyly turǵyn úı qoryn jańǵyrtý baǵdarlamasy bastalǵannan beri 1070 úı jóndeýden ótti, 1023 úıde 2155 jedelsaty aýystyryldy.
Memlekettik jańǵyrtý baǵdarlamasy aıasynda turǵyndar jóndeý jumystaryn ótkizý úshin ótinish bere alady. Ol úshin menshik ıeleriniń 51% daýysyn jınap, ótinish berý qajet.
Jóndeý jumystarynyń quny kommýnaldyq tólemderge qosylady jáne memleketke qaıtarymdy negizde óteledi.
Buǵan deıin, kúnniń sýytýyna baılanysty Almatynyń kommýnaldyq qyzmeti kúsheıtilgen jumys rejımine kóshkeni belgili boldy.
Sondaı-aq, Almatyda qala mańyna qatynaıtyn taǵy bir jańa avtobýs baǵyty ashylǵany habarlandy.
