Almatyda bıyl 100-den astam lıft aýystyrylady
ALMATY. KAZINFORM – Almatyda bıyl kóppáterli turǵyn úılerdegi 105 lıftini aýystyrý josparlanyp otyr.
Kommýnaldyq ınfraqurylym jáne turǵyn úı ınspektsııasy basqarmasynyń málimetinshe, jańartylatyn jedelsatylardyń 47-si 25 jyldan astam ýaqyt paıdalanylǵan, al 58-i tehnıkalyq turǵydan kúrdeli jóndeýdi qajet etedi. Joba 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda iske asyrylady.
- Qazir Almatyda 14,5 myńǵa jýyq lıft paıdalanylyp jatyr. Onyń ishinde 8,4 myńnan astamy 2 671 kóppáterli turǵyn úıde ornatylǵan, - dep habarlady basqarmadan.
Vedomstvo ókilderi lıftilerdiń tozý deńgeıin eskere otyryp, turǵyndardyń qaýipsizdigin qamtamasyz etý úshin qalada jyl saıyn keminde 150 jedelsatyny jańartý qajet ekenin atap ótti.
Eske salaıyq, buǵan deıin Almatyda ótkelderdegi lıftini qoldaný máselesi qalaı sheshiletinin jazǵanbyz.
