Almatyda bes kóshe uzartylady
Megapolıste Úlken Almaty aınalma avtomobıl jolyna qosylatyn bes radıaldy kósheni uzartý jumystary júrgizilip jatyr, dep habarlaıdy Kazinform.
Joba boıynsha Úlken Almaty aınalma avtomobıl jolyna Saın, Tilendıev, Soltústik aınalma kósheleri men Rysqulov jáne Abaı dańǵyldary qosylýy kerek.
Qalalyq mobıldilik basqarmasy basshysynyń orynbasary Ernur Ábjahan atap ótkendeı, jalpy uzyndyǵy 3,2 km Saın kóshesin uzartý jumystary 65% aıaqtaldy.
«Osy joba boıynsha 66 jer ýchaskesin alý qarastyrylyp jatyr, onyń 65-i búgingi kúni satyp alynǵan. Jumys birtindep júrgizilýde. Jumystardy júrgizý kestesi boıynsha Rysqulov dańǵylynan Móke bı kóshesine deıin Saın kóshesin uzartýdy aıaqtaý jáne paıdalanýǵa berý 2024 jyldyń qyrkúıegine josparlanǵan», - dedi ol Almaty qalasy máslıhatynyń otyrysynda.
Sondaı-aq Rysqulov dańǵylyn Ońǵarsynova kóshesinen qala shekarasyna deıin uzartý josparlanyp otyr. Onyń jalpy uzyndyǵy – 2,3 km. Ernur Ábjahannyń aıtýynsha, bul joba boıynsha jumystar endi bastaldy.
«Jobada 274 jer ýchaskesin alý kózdelgen. Búgingi tańda 56 ýchaske boıynsha qaýly qabyldandy. Bul baǵytta jer qatynastary basqarmasynyń jumysy jalǵasýda. Nysandy aıaqtaý jáne iske qosý 2025 jylǵa josparlanǵan», - dedi ol.
Abaı kóshesin Momyshuly kóshesinen qala shekarasyna deıin uzartýǵa keletin bolsaq, josparlanǵan jumystardyń 5,3 km, 4,7 km jol jumystary júrgizildi, onyń bir bóligi paıdalanýǵa berildi.
«Bul joba JSQ túzetý satysynda tur, qazir memlekettik saraptamadan ótýdemiz. 2024 jyldyń birinshi toqsanynda memlekettik saraptamanyń qorytyndysyn alýdy josparlap otyrmyz. Odan keıin qurylys-montaj jumystary bastap, 2024 jyldyń sońyna deıin paıdalanýǵa berý josparda bar», - dedi Ernur Ábjahan.
Ol Tilendıev kósheleri men Soltústik aınalma joldyń boıynda qazirgi ýaqytta JSQ ázirlenip jatqanyn, onyń aıaqtalýy 2024 jyldyń sońyna josparlanǵanyn atap ótti.
«Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvalar» boıynsha barlyq jumysty 2027 jylǵa deıin aıaqtaý josparlanǵan.
