Almatyda belsendiler 50 dúkenniń sóresinen merzimi ótip ketken ónimderdi alyp tastady
ALMATY. KAZINFORM – «Jańa adamdar» qozǵalysynyń belsendileri Almatydaǵy birneshe dúkende merzimi ótken ónimderdiń ashyq satylymda turǵanyn anyqtap, azamattardy tutynýshylyq mádenıetti arttyrýǵa jáne óz quqyqtaryna beıjaı qaramaýǵa shaqyrdy.
«Merzimi ótip ketken» dep atalatyn azamattyq naýqan aıasynda sońǵy bir jyl ishinde belsendiler qaladaǵy 50-den astam dúkenge tekserý júrgizip, barlyǵynan jaramdylyq merzimi ótip ketken taýarlar anyqtaǵan. Sút ónimderi, shirigen et, qurǵaq tiskebasarlar – munyń bári sórelerde esh kedergisiz satylyp kelgen.
Tekserý kezinde dúken ıeleri men qyzmetkerleri jıi qaıtalanatyn syltaýlar aıtqan: «Kórmeı qalyppyz», «Kezdeısoqtyq qoı», «Búgin alyp tastaımyz». Alaıda mundaı jaýaptardan keıin de jaǵdaı ózgermegen.
– Dúkendegi merzimi ótken ónim – bul máseleniń túpki sebebi emes, tek saldary ǵana. Shynaıy másele – dúken ıeleri men satyp alýshylardyń bul jaǵdaıǵa nemquraıly qaraýy, – deıdi qozǵalys ókili Tórehan Bekejan. – Ózińe qurmet degenimiz – «men ózimdi ýlaýǵa jol bermeımin» dep aıtý. Al eger tutynýshy ózine qurmetpen qarasa, dúken de tańdaý jasaýǵa májbúr bolady.
Máselen, Nazarbaev dańǵyly, 36k4 mekenjaıyndaǵy «Baq market» sýpermarketinde belsendiler shirigen ónimderdiń júıeli túrde satylyp kelgenin anyqtaǵan. Olar úsh konteınerge jýyq jaramsyz ónimdi ózderi suryptap, dúkenniń kóz aldynda kádege jaratqan. Qyzmetkerler tarapynan qarsylyq pen agressııa bolǵanymen, belsendiler tutynýshynyń densaýlyǵy – basty qundylyq ekenin atap ótti.
Qozǵalys ókilderi bul bastamanyń basty maqsaty – qoǵamda ózine jáne bir-birine degen qurmet mádenıetin qalyptastyrý ekenin aıtady. Jaramsyz ónimmen kúres tek sanıtarlyq emes, azamattyq jáne adamı jaýapkershilik máselesi retinde qaralýy tıis.
Aıta keteıik, Qazaqstandaǵy onlaın saýdanyń 90 paıyzy Almatyda jasalady.