Almatyda Bek Air ushaǵynyń apatyna baılanysty sot úkimi shyqty

ALMATY. KAZINFORM — Almatyda 2019 jyly bolǵan Bek Air ushaǵynyń apatyna qatysty sot úkimi shyqty. 

Sot marqum ushqyshtar — Meıirjan Moldaqulov pen Marat Muratbaevty Qylmystyq kodeksiniń 344-babynyń 3-bóligi (áýe kóligin basqarý nemese paıdalaný kezinde qaýipsizdik qaǵıdalaryn buzý, árekettiń abaısyzdyqtan eki nemese odan da kóp adamnyń ólimine ákep soǵýy) boıynsha kináli tanydy. Olardyń ómirden ótýine baılanysty qylmystyq jaza taǵaıyndalǵan joq.

— Tergeý barysynda ushqyshtardyń ushý erejelerin on bir ret buzǵany anyqtaldy. Atap aıtqanda, olar ushýǵa deıingi tekserýdi tıisinshe júrgizbegen, qanattaǵy muz qatýyn baıqamaǵan jáne muzdanýǵa qarsy óńdeý júrgizý týraly sheshim qabyldamaǵan. Sonymen qatar ushý kezinde ushaqtyń kóterilý buryshy men baǵytyn saqtaý talaptary buzylǵan. Bul jaǵdaıda ushýdy toqtatý qajet edi. Atalǵan qatelikter men áýe kemesiniń komandıri men ekinshi ushqyshtyń áreketsizdigi apatqa ákelip soqqan, — dep habarlady sot.

Sot jaryssózinde prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.

Al jábirlenýshi taraptyń advokaty qaza tapqan ushqyshtardy aqtap, olardyń ornyna Almaty halyqaralyq áýejaıy men Azamattyq avıatsııa komıteti qyzmetkerlerin jaýapqa tartýdy surady.

Sondaı-aq ushqyshtardyń áıelderi taǵylǵan aıypqa narazylyq bildirdi.

Sot barysynda Bek Air áýe kompanııasynyń múlkine shekteý qoıdy.

Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.