Almatyda «Baısat» bazary aýktsıonda 24 mlrd teńgege satyldy
ALMATY. KAZINFORM – Almatyda ornalasqan «Baısat» bazary qomaqty qarajatqa satyldy.
«Qaıtarylǵan aktıvterdi basqarý kompanııasy» JShS sauda.e-qazyna portalynda «Baısat» kóterme-bólshek saýda ortalyǵyn ashyq elektrondyq saýdaǵa qoıǵan bolatyn. Aýktsıon búgin, 7 tamyz saǵat 12:00–de ótip, nysan 24 772 753 285 teńgege satyldy. Alaıda bazardyń jańa ıesiniń esimi kórsetilmedi.
Eske salaıyq, 2024 jyly Qaırat Satybaldynyń ulyna tıesili «Baısat» bazarynyń bir bóligi memleketke qaıtaryldy. Almaty qalasynyń mamandandyrylǵan aýdanaralyq ekonomıkalyq soty «Almaty jylý» holdıng kesheniniń (qazirgi «Baısat» bazary) múlkimen jasalǵan barlyq mámileni jaramsyz dep taný týraly sheshim shyǵardy.
Oǵan deıin sotqa deıingi tergeý aıasynda Qaırat Satybaldy «Baısat» bazarynyń basym bóligin óz erkimen qaıtaryp bergen bolatyn.
Nysan «Qaıtarylǵan aktıvterdi basqarý kompanııasy» JShS-nyń menshigine berildi. Kompanııa alǵash ret «Baısatty» 2025 jyldyń qyrkúıek aıynda aýktsıonǵa shyǵardy. Ol kezde nysan 28,6 mlrd teńgege baǵalandy. Alaıda mundaı qomaqty qarajatty tóleýge daıyn satyp alýshy tabylmady.
2025-2026 jyldardyń ishinde taǵy birneshe aýktsıon ótse de, bazardy eshkim satyp almady. Al QR Qarjy mınıstrligi Memlekettik múlik jáne jekeshelendirý komıtetiniń tóraǵasy Nurmahan Ádilbekov nysan aldaǵy ýaqytta satylmasa, Almaty qalasy ákimdiginiń kommýnaldyq menshigine berilýi múmkin ekenin aıtty.
