Almatyda Baým toǵaıyn abattandyrý jumystary 1 maýsymǵa deıin aıaqtalady

ALMATY. KAZINFORM – Almaty ákiminiń orynbasary Almashan Smatlaev Baým toǵaıyn jańartý jumystary qalaı júrip jatqanyn aıtyp berdi.

- Abattandyrý jumystarynyń aıaqtalý merzimi 2026 jyldyń 1 maýsymyna deıin qoıyldy. Joba boıynsha 15 shildege deıin bolǵan. Sondyqtan balalardy qorǵaý kúnine oraı biz aýmaqty tolyǵymen ashýdy josparlap otyrmyz, - dedi Almashan Smatlaev.

Onyń aıtýynsha, megapolıstiń eń kórnekti tabıǵı aýmaqtarynyń birinde tek ekologııalyq jumystar júrgizilip jatyr.

- Keńes Odaǵy kezinen beri turǵan qaýipti oıyn alańdary – ekologııalyq taza, aǵash oıyn alańdaryna aýystyrylady. Beınekameralar ornatylady, jaryqtandyrý jaqsartylady jáne úsh polıtsııa beketi ornalastyrylady. Óıtkeni keshki ýaqytta sol jerde júrseńiz, aýmaqtyń qaýipti ekenin kóz jetkizesiz, - dedi ol.

Ótken jyly Baým toǵaıyndaǵy zańsyz aǵash kesý derekteri týraly pikir bildirgen ákimniń orynbasary tergeý amaldary júrgizilip jatqanyn jáne tergeý polıtsııanyń qaraýynda ekenin atap ótti.

Eske salaıyq, Baým toǵaıy Almaty ákimdiginiń menshiginde jáne erekshe qorǵalatyn tabıǵı aýmaq mártebesine ıe. Nysannyń aýdany 139 gektardan asady. Toǵaı aýmaǵynda aǵashtardyń 49 túri ósedi.

Buǵan deıin Almatydaǵy Baým toǵaıynda belgisiz adamdar aǵashtardy zańsyz keskenin jazǵanbyz.