Almatyda «Batyr» prezıdenttik polkiniń sarbazdary ant qabyldady
ALMATY. KAZINFORM — QR Memlekettik kúzet qyzmeti Aıryqsha maqsattaǵy kúshteriniń áskerı bólimderinde áskerı ant qabyldaý rásimi boldy.
Almatynyń 28 gvardııashy-panfılovshylar saıabaǵynda «Batyr» prezıdenttik polkine qabyldanǵan kúzgi shaqyrylym boıynsha merzimdi áskerı qyzmet sarbazdary ant qabyldady. Saltanatty rásimge jas sarbazdardyń ata-analary men jaqyndary qatysty.
QR Memlekettik kúzet qyzmeti qataryna qosylǵan sarbazdar elimizdiń barlyq aımaqtary men respýblıkalyq mańyzy bar qalalarynan iriktelip alynǵan.
Olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıyndaý kýrsynan ótti.
QR Memlekettik kúzet qyzmeti Aıryqsha maqsattaǵy kúshter Shtaby bastyǵynyń orynbasary Medet Elemesov búgin Almatyda 100-ge jýyq sarbaz ant qabyldaǵanyn aıtty.
— Jas sarbazdar tájirıbeli nusqaýshylyq quramnyń jetekshiligimen oqý kýrstarynan ótip, tálim-tárbıe aldy. Búgin Otan aldynda áskerı ant berdi. Endi Qazaqstan Respýblıkasynyń memlekettik rámizderin kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarýǵa kirisedi, — dedi ol.
Medet Elemisovtiń aıtýynsha, QR Memlekettik kúzet qyzmetiniń qataryna merzimdi áskerı qyzmetshi retinde elimizdiń 18 ben 27 jas aralyǵyndaǵy, boıy 180 santımetrden joǵary, bilimi orta jáne odan joǵary, densaýlyǵy jaqsy kez kelgen azamat qabyldana alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Sondaı-aq ol QR Memlekettik kúzet qyzmetiniń merzimdi qyzmet sarbazdary úshin áleýmettik qoldaý boıynsha Qazaqstan Respýblıkasynda belgilengen barlyq jeńildikteri qoldanylatynyn atap ótti.
— Men Almaty oblysynan shaqyryldym. Biz buǵan deıin tereń medıtsınalyq, psıhologııalyq tekseristen ótip, komıssııa sheshimen «Batyr» prezıdenttik polkine qabyldandyq. Osynda merzimdi áskerı mindetimdi ótep jatyrmyn. Búgin erekshe kún, sebebi qarýlas baýyrlarymyzben birge áskerı ant qabyldadyq. Bul — erekshe sezim. Merzimdi áskerı mindetimdi ótegen soń, men kelisimshartpen áskerı qyzmette qalǵym keledi, — dedi 0111 áskerı bóliminiń sarbazy Aqjol Ablahatov.
Eske salaıyq, Astanada 200-den asa sarbaz Otanǵa adal bolýǵa ant berdi.