Almatyda batareıa ystyq bolsa da, páter ishi nege salqyn
ALMATY. KAZINFORM — «Almaty jylý júıesi» JShS jylytý maýsymynda almatylyqtar jıi kezigetin jaǵdaıdyń sebebin túsindirdi. Atap aıtqanda, batareıa ystyq bolǵanymen, páter ishi salqyn bolyp qala beredi. Mamandardyń aıtýynsha, negizgi sebepterdiń biri — ǵımarattyń qorshaý qurylymdary arqyly bolatyn jylý shyǵyny.
«Almaty jylý júıesi» málimetinshe, qabyrǵa, shatyr, tereze oıyqtary men panelaralyq jikter jetkilikti deńgeıde oqshaýlanbaǵan jaǵdaıda, jylý energııasynyń 60-70%-ǵa deıini syrtqa ketýi múmkin. Tıptik turǵyn úılerge júrgizilgen teplovızııalyq zertteýler de osyny kórsetken. Mundaı jaǵdaıda jylytý júıesindegi jylýtasyǵysh temperatýrasyn arttyrý árdaıym páter ishiniń jylynýyna áser ete bermeıdi.
Mamandar jylý shyǵynynyń kúsheıgenin bildiretin belgi retinde mynalardy atady:
• syrtqy qabyrǵalar men buryshtardyń salqyndaýy;
• terezeler men eńisterde kondensattyń túzilýi;
• ylǵaldaný nemese kógerý;
• uqsas, biraq jylýy jaqsy úılermen salystyrǵanda jylytýǵa ketetin shyǵynnyń joǵary bolýy.
Kompanııa ókilderiniń aıtýynsha, jylý ǵımarattan birneshe jolmen: jylýótkizgishtik (qabyrǵa, tereze, shatyr, eden), konvektsııa (sýyq betterdiń mańynda aýanyń aınalymy men salqyndaýy), sondaı-aq jylýlyq sáýlelený arqyly shyǵýy múmkin.
«Almaty jylý júıesi» JShS jylý shyǵynyn azaıtýǵa baǵyttalǵan sharalardy jylytý maýsymynan tys kezeńde júrgizgen durys ekenin eskertti.
— Mundaı sharalarǵa qasbet pen shatyr asty jabyndaryn jylylaý, panelaralyq jikterdi germetızatsııalaý, terezelerdi energııa únemdeıtin túrine aýystyrý, sondaı-aq kireberis toptaryn tyǵyzdaý jatady, — delingen habarlamada.
Keshendi tásil jylý shyǵynyn qysqartyp, ǵımarattardyń energııa tıimdiligin arttyrýǵa múmkindik beredi. Mamandar turǵyndarǵa úıdiń tehnıkalyq jaǵdaıyn baǵalaý jáne qajetti jańǵyrtý sharalaryn josparlaý úshin basqarýshy kompanııalarǵa, PIK nemese MIB uıymdaryna júginýdi usyndy.
Eske salaıyq, buǵan deıin Almaty oblysynyń birneshe aýylyna jylý jetispeı otyrǵanyn jazǵanbyz.