Almatyda bastapqy baǵasy arzandaǵan «Baısat» bazary qaıtadan satylymǵa shyǵaryldy

ALMATY. KAZINFORM — Almatyda «Baısat» bazary ekinshi ret satylymǵa shyǵaryldy. 

Bul týraly Qaıtarylǵan aktıvterdi basqarý kompanııasy habarlady. Kóterme-bólshek saýda ortalyǵynyń úlesin satý boıynsha qaıtalama aýktsıon sauda.e-qazyna.kz elektrondyq platformasynda ornalastyryldy. 

Aýktsıon 2025 jyldyń 26 jeltoqsanynda saǵat 11:00–de ótedi. Saýda-sattyqtyń bastapqy baǵasy 26 706 317 643 teńge.

Buǵan deıin E-Qazyna portalynda «Baısat» kóterme-bólshek saýda ortalyǵy ashyq elektrondyq saýdaǵa qoıylǵan edi. Alǵashqy habarlandyrýda bazardyń bastapqy baǵasy 28,6 mlrd teńge boldy.

Alaıda bıyl 18 qarasha kúni satý nysany boıynsha tirkelgen qatysýshylar joq bolǵandyqtan, aýktsıon toqtady.

Eske salaıyq, 2024 jyldyń qańtarynda Qaırat Satybaldynyń ulyna tıesili «Baısat» bazarynyń bir bóligi memleketke qaıtarylǵanyn jazǵanbyz.