Almatyda básekelestik zańyn buzǵandardan 4,6 mlrd teńge aıyppul óndirildi
ALMATY. KAZINFORM — Almatyda naryqtaǵy básekelestikke baılanysty 14 ret taldaý jasalǵan. Bul týraly Básekelestikti qorǵaý jáne damytý agenttiginiń Almaty boıynsha departament basshysy Nurjan Nurlanuly aıtty.
Onyń aıtýynsha, monopolııaǵa qarsy organ básekelestikti damytýǵa járdemdesý, zań buzýshylyqtyń aldyn alý maqsatynda taýar naryqtaryna taldaý júrgizgen.
— Bizdiń jumysymyz zań buzýshylyqty anyqtaý ǵana emes, onyń aldyn alýǵa da baǵyttalǵan. Biz naryqty taldap, básekelestik deńgeıin baǵalaımyz. Mundaı tásil naryqtyq ortany retteýge múmkindik beredi, — dedi ol.
2025 jyly departament avıatsııalyq otyn boıynsha kóterme jáne bólshek saýdasyna, turǵyn úıdiń bastapqy saýdasyna, sondaı-aq elektr energııasynyń kóterme saýdasyna taldaý júrgizgen. Onyń qorytyndysy boıynsha 23 habarlama men 6 nusqama engizilip, 16 ákimshilik quqyq buzýshylyq týraly is qozǵalǵan. Jalpy óndirilgen aıyppuldyń jalpy somasy 4,6 mlrd teńgeden asty. Negizgi buzýshylyqtar monopolııalyq jaǵdaıdy teris paıdalaný derekterine qatysty, barlyǵy mundaı 9 jaǵdaı tirkeldi.
Nurjan Nurlanuly tutynýshylardyń ótinishimen «Alseko» kompanııasynyń kommýnaldyq qyzmetter úshin túbirtek qalyptastyrý qyzmeti qaralǵanyn atap ótti. Tergeý qorytyndysy birinshi satydaǵy sotqa talap-aryz berilgen. Bul is áli qaralyp jatyr.
— Biz úshin turǵyndar men bıznestiń múddesin qorǵaý asa mańyzdy. Eger sot bizdiń ustanymdy túpkilikti qoldasa, bul qaladaǵy barlyq tutynýshynyń quqyǵyn qorǵaýǵa múmkindik beredi. Biz barynsha uqypty ári tek quqyqtyq alańnyń sheńberinde áreket etemiz, — dedi departament basshysy.
Eske salaıyq, Pavlodarda básekelestik zańyn buzǵan kondıterlik kompanııa qomaqty aıyppul arqalady.