Almatyda bas shyrshanyń shamdary jaǵyldy
ALMATY. KAZINFORM — Dástúr boıynsha jańa jyldyq shyrsha shamy Táýelsizdik merekesinen keıin jaǵyldy. Bas shyrsha respýblıka saraıy aldyndaǵy Abaı alańynda ornatyldy.
Jańa jyldyń basty sımvolynyń bıiktigi - 25 metr. Shyrsha 6 shaqyrym gırlıanda, sándik elementter, shyrsha sharlary, iri banttar jáne qaıta óńdelgen ekologııalyq qaýipsiz materıaldardan jasalǵan jańa jyldyq oıynshyqtarmen bezendirlgen.
Bas shyrshany jaǵý rásiminde Roza Rymbaeva, Turar, Baljan Bıdash, «Alfa» toby, Dınara, Nazym Ádildına, Mádı Rymbaev, Dakelot, «Astra» toby, Adill jáne Malika Yes jáne basqa da estrada juldyzdary óner kórsetti.
Merekelik sharaǵa jınalǵan 8 myńnan astam almatylyq pen megapolıs qonaqtary qazaq estrada juldyzdarynyń qatysýymen ótken tamasha shoýdyń kýási boldy.
Budan bólek, Abaı alańyna kelgen qala turǵyndary men qonaqtaryn Kúlbıke kúımesi, Zimbir adam jáne basqa da ertegi keıipkerleri qarsy alady. Іri ári jarqyn fotozonalar, jarqyraǵan sýburqaqtar jáne basqa da ınstallıatsııalar halyqqa erekshe merekelik atmosfera syılap jatyr.
— Men jas ónerpazdardy quttyqtap, qoldaý kórsetý úshin keldim. Óte ádemi shyrsha. Mereke joǵary dárejede uıymdastyrylǵan. Qoıylymdar keremet boldy, aýa raıy da tamasha bolyp tur, — deıdi megapolıs turǵyny Sergeı.
Sondaı-aq, jańa jyldyq shyrshalar megapolıstiń barlyq aýdanynda jaǵyldy. Olardyń sany — 80.
Sonymen qatar, Abaı alańynda 2024 jyldyń 20 jeltoqsanynan 2025 jyldyń 5 qańtaryna deıin merekelik jármeńke ótedi.
Munda qolóner buıymdary, kádesyılar jáne jańa jyldyq oıynshyqtar usynylady.
