Almatyda Barlyq bazarynyń ornyna salynatyn kólik toraby qandaı bolady
ALMATY. KAZINFORM – Almaty qalasynyń kireberisterinde oblys pen megapolısti baılanystaryn kólik toraptary salynady.
Olardyń biri - Almatynyń batysynda ornalasqan «Barlyq» bazarynyń ornynda bolady. Bul kólik toraby ońtústiktegi kórshi oblystar men Qarasaı, Jambyl aýdandarynyń turǵyndaryn qarsy alatyn qala qaqpasyna aınalmaq. Bıyl 9 qańtardan bastap qurylys jumystarynyń bastalýyna baılanysty bazar tolyqtaı jabyldy.
Kazinform agenttigi Almaty qalasynyń jol ınfraqurylymyn damytý basqarmasyna júginip, atalǵan joba aıasynda qandaı jumystar isteletinin naqtylady. Vedomstvo qazir burynǵy bazar ornynda ınjenerlik jelilerdi kóshirý jáne negizgi qurylys jumystaryna daıyndyq júrgizilip jatqanyn habarlady.
Aldaǵy ýaqytta munda kóp deńgeıli avtoturaq pen avtobýs turaqtary salynbaq. Odan bólek qurylysy aıaqtalýǵa jaqyndap qalǵan «Qalqaman» beketinen osy jaqqa metro jelisi júrgiziledi jáne birinshi jeliniń sońǵy aıaldamasy osynda ornalasady. Sonymen qatar kólik torabynda LRT jelisi júrgizilip, jyldam relsti kóliktiń beketi salynady.
- Almaty qalasynyń Bas josparyna sáıkes, atalǵan aýmaqta «Batys» kólik-aýysyp otyrý torabyn ornalastyrý kózdelgen. Joba boıynsha munda metropolıten stantsııasy, jeńil relsti kólik (LRT) stantsııasy, sondaı-aq jeńil kólik pen avtobýstarǵa arnalǵan avtoturaq ınfraqurylymy qarastyrylǵan. Jobany iske asyrý qala mańyndaǵy eldi meken turǵyndary úshin Almatynyń ortalyq aýdandaryna yńǵaıly kólik baılanysyn qamtamasyz etedi, - deıdi basqarma ókilderi.
Qazir bazar aýmaǵynda qurylys jumystaryna daıyndyq júrgizilip jatqanymen, metro ne LRT beketi syndy iri jobalardyń qurylysy qashan bastalatyny belgisiz. Sebebi vedomstvo kólik torabyn salýǵa bıyl bıýdjetten qarajat bólinbegenin atap ótti.
Eske salaıyq, Almatyda LRT jobasynyń tehnıkalyq-ekonomıkalyq negizdemesi ázirlendi. Qujat málimetteri boıynsha birinshi jeli B.Momyshuly, Tóle bı, Abylaı han kóshelerimen ótedi. Keıin LRT jelisiniń 2-shi kezegi «Barlyq» kólik-aýysyp otyrý torabynan Momyshuly kóshesine deıin salynady. Qurylys jumystaryn 2027 jyly bastap, 2029 jyly aıaqtaý josparlanyp otyr.
