Almatyda Barlyq bazaryna deıingi metro jelisiniń qurylysy bastaldy - qala ákimi
ALMATY. KAZINFORM – Almatyda qoldanystaǵy metro jelisi «Barlyq» bazaryna deıin uzartylady.
Almatyda qalalyq máslıhattyń kezekti LI (51-shi) sessııasy ótti. Oǵan qatysqan Almaty ákimi Darhan Satybaldy qalada iske asyrylyp jatqan aýqymdy jobalarǵa toqtaldy.
Qala basshysynyń aıtýynsha, 2026 jyldyń sońyna deıin «Qalqaman» metro beketi ashylady. Sondaı-aq bul stantsııadan «Barlyq» bazaryna deıingi jeliniń qurylysy bastalǵan.
— Metropolıtendi kezeń-kezeńmen damytyp kelemiz. «Barlyq» stantsııasyna deıingi metro jelisiniń qurylysy bastaldy. Sondaı-aq «Jibek joly» stantsııasynan áýejaıǵa deıingi ekinshi jelini jobalaý jumystary júrgizilip jatyr, — dedi ol.
Almaty ákimi kólik ınfraqurylym damytýdyń kelesi mańyzdy kezeńi — Skytrain ekenin atap ótti.
Onyń aıtýynsha, bul joba kelesi jyly qolǵa alynady.
Sessııa barysynda Almaty qalasy Ekonomıka jáne qarjy basqarmasynyń basshysy Baýyrjan Qudaıbergenov qala basshysy atap ótken jobalarǵa qansha qarajat qarastyrylǵanyn naqtylady.
Onyń sózinshe, «Qalqaman» beketin iske qosý jumystaryna 1,1 mlrd teńge bólinedi. Al «Qalqaman» beketinen «Barlyq» bazaryna deıingi metro jelisiniń qurylysyna jergilikti bıýdjetten 243 mln teńge, al ınfraqurylymdy damytý qorynan 45 mlrd teńge jumsalady. «Jibek joly» stantsııasynan áýejaıǵa deıingi ekinshi jeliniń jobalaý-smetalyq qujattamasyn ázirleýge 150 mln teńge qarastyrylǵan.
Eske salaıyq, buǵan deıin Almaty metrosy úsh baǵytta qalaı uzartylatynyn jazǵanbyz.
Sondaı-aq Raıymbek dańǵylyndaǵy BRT qurylysy Almaty SkyTrain jobasyn iske asyrýǵa baılanysty keıinge shegerilgenin jazǵan edik.
