Almatyda «Barlyq» bazaryna baratyn metro jelisiniń jobasy 3 mlrd teńgege jasalady
ALMATY. KAZINFORM — Memlekettik satyp alý saıtynda «Qalqaman» metro beketinen «Barlyq» bazaryna deıin Almaty metropolıteniniń úshinshi kezegin salý jobasy boıynsha jobalaý-smetalyq qujattamany ázirleýge habarlandyrý jarııalandy.
Lotqa ótinim qabyldaý búgin, 4 maýsym kúni ashyldy jáne 9 maýsymǵa deıin jalǵasady. Joba quny — 2 976 119 950 teńge, al tapsyrys berýshi mekeme — Almaty metropolıteni.
Habarlandyrýda kórsetilgen tehnıkalyq erekshelikterine sáıkes, birinshi metro jelisiniń úshinshi baǵyty «Qalqaman» stantsııasynan batys baǵytta Abaı dańǵyly boıymen Alataý dańǵylyna deıin, odan soltústik baǵytta Alataý dańǵyly boıymen Raıymbek dańǵylyna deıin, ári qaraı batys jaqqa qaraı «Barlyq» bazaryna deıin jalǵasady. Metro beketterdiń ornalasýy:
№ 1 stantsııa — Abaı dańǵylynan soltústiktegi Alataý dańǵyly boıynda;
№ 2 stantsııa — Tóle bı kóshesinen soltústiktegi Alataý dańǵyly boıynda;
№ 3 stantsııa — «Barlyq» bazarynyń aýmaǵynda, Raıymbek batyr dańǵylynyń ońtústiginde, Alataý dańǵylynyń batysynda.
Eske salaıyq, bıyl aqpan aıynda «Qalqaman» metro beketine deıingi týnnel tolyq qazyldy. Ol jyl sońyna deıin qoldanysqa berilýi tıis. Lotta kórsetilgen metro jelisi osy stantsııanyń jalǵasy retinde salynady.
Buǵan deıin Almaty ákimi aldaǵy 3 jylda metro «Barlyq» bazaryna deıin jetetinin aıtty.
Sondaı-aq qazir qoldanystaǵy Almaty metrosynyń beketterinde platformalyq esikterdi ornatylatynyn jazǵanbyz. Oǵan 7 mlrd teńge jumsalady.
