Almatyda bankrot atanǵan azamattardyń sany 4 myńnan asty

ALMATY. KAZINFORM – Bıyl bankrot atanǵan azamattardyń sany 100-ge jetpeıdi.

Almaty qalasy Memlekettik kirister departamentiniń málimetinshe, búginge deıin megapolıste 4202 azamat bankrot dep tanylǵan. Onda sottan tys bankrot dep tanylǵandar sany - 4054 azamat, al sot sheshimimen bankrot dep tanylǵandar - 148.

Onyń ishinde 2023 jyly 1334 azamatqa, 2024 jyly 2805 azamatqa, 2025 jyly 63 azamatqa bankrot mártebesi berilgen. Osy ýaqytqa deıin bankrot dep tanylǵan azamattardyń arasynda eń kóp qaryz 22 993 360 660 teńge bolsa, eń az qaryz 250 000 teńge. Al tólem qabilettiligin qalpyna keltirý rásimin búginge deıin 13 azamat qoldanǵan.

- 2025 jyldyń 1 qańtarynan bastap 3023 boryshkerge sottan tys bankrottyq rásimin qabyldaý ótinishine bas tartyldy. 2023 jyldan beri 12500 boryshkerge sottan tys bankrottyq rásimin qabyldaý ótinishinen bas tartyldy, - dep habarlady Memlekettik kirister departamentinen.

Sottan tys bankrottyq rásimin qabyldaý ótinishine bas tartýdyń negizgi sebepteri:

1. Ortaq menshiktegi múlikti qosa alǵanda, jeke múliktiń bolýy;

2. Aryz berilgen kúnge deıin 12 aı ishinde tólem óteýiniń bolýy.

Osy ýaqytqa deıin bankrottyq rásimdi múlik jasyrý ne ózge sebepterge baılanysty toqtatý faktileri bolmaǵan.

Eske salaıyq, 2023 jyldyń 3 naýryzynda elimizde jeke tulǵalardyń bankrottyǵyn rásimdeýge ótinish qabyldaý bastaldy.

Keıin jeke tulǵanyń bankrottyǵy týraly jańa «Qoldaý» aqparattyq júıesi iske qosyldy.

Bıyl sottan tys bankrottyq rásimin qoldaný jeńildetildi.

Atap aıtqanda, kelesi qujattardy tapsyrý talap etilmeıdi:

1) naqty qaryz somasyn rastaıtyn qujattar;

2) árbir nesıe berýshiniń ataýy týraly málimetter;

3) qaryzdy retteý áreketterin dáleldeıtin túrli anyqtamalar men málimetter.

Buǵan deıin bankrottyq rásiminiń qandaı saldary bar ekenin jazǵanbyz.