Almatyda balyqshynyń qarmaǵyna oq-dári bar sómke ilingen
ALMATY. KAZINFORM — Almatyda balyqshynyń qarmaǵyna kútpegen olja ilikti.
Shamamen saǵat 17:00-derde «102» pýltine Almatynyń Túrksib aýdanynan habarlama túsken.
Er adam qalalyq «Maıak» kólinde balyq aýlap otyrǵan. Qarmaǵyn sýǵa laqtyrǵan kezde ilmektiń aýyr zatqa ilingenin sezgen. Jipti tartyp qalǵanda, sýdan sómke shyqqan. Sómkeniń ishinen oq-dáriler tabylǵan.
Oqıǵa ornyna Túrksib aýdandyq polıtsııa basqarmasynyń jedel-tergeý toby dereý jetip, oq-dárilerdi tárkiledi.
Qazir olardyń qaıdan paıda bolǵany men kimge tıesili ekenin anyqtaý úshin ballıstıkalyq saraptama taǵaıyndaldy.
Atalǵan fakti boıynsha qylmystyq is qozǵalyp, tergeý júrgizilip jatyr.
Eske salaıyq, Almaty oblysynda joǵalǵan úsh balyqshy aman-esen tabylǵanyn habarladyq.
