Almatyda balany aıaýsyz tepken er adam qamaýǵa alyndy

ALMATY. KAZINFORM – Almatydaǵy turǵyn úı keshenderiniń biriniń aýlasynda er adamnyń balany tepken sáti beınebaqylaý kamerasyna túsip, áleýmettik jelide tarady.

Oqıǵa Alataý aýdanynda bolǵan. Vıdeodan er adamnyń balalar alańynda júgirip baryp, bar kúshimen balany tepkenin kórýge bolady. Bala qulap qalǵan, al er adam oqıǵa ornynan ketip qalǵan.

Almaty polıtsııa departamentiniń málimetinshe, Alataý aýdandyq polıtsııa basqarmasy bul derek boıynsha qylmystyq is qozǵady.

Kúdikti dereý ustalyp, ýaqytsha ustaý ızolıatoryna qamaldy.

— Balalarǵa qatysty mundaı áreketterge jol berilmeıdi jáne olar zań aıasynda qatań túrde toqtatylady. Qazir oqıǵanyń barlyq mán-jaıy anyqtalyp jatyr. Tergeý polıtsııa departamenti basshylyǵynyń baqylaýynda, — delingen vedomstvo habarlamasynda.

Bala quqyqtary jónindegi ýákil Dınara Zákıeva da oqıǵaǵa qatysty túsinik berdi.

Onyń aıtýynsha, bul oqıǵa boıynsha jaǵdaı baqylaýda jáne balaǵa tıisti kómektiń bári kórsetiledi.

Eske salaıyq, buǵan deıin Almatyda 6 jastaǵy balany urǵan burynǵy qoǵamdyq keńes múshesi jazalanǵanyn jazǵanbyz.