Almatyda balamen jumys isteıtin mekemeler eskertýsiz tekseriletin bolady
ALMATY. KAZINFORM – Almatyda balalardyń quqyǵyn qorǵaý júıesine jańa tásil engizilip jatyr. Bul týraly Almaty qalasy balalardyń quqyǵyn qorǵaý basqarmasynyń basshysy Janat Aıtpaeva aıtty.
Onyń sózinshe, balanyń quqyǵyn qorǵaý basqarmasynyń qurylýy – kezekti ákimshilik reforma emes, qaıta balany qorǵaý salasyndaǵy memlekettik saıasattyń jańa kezeńi.
- Alǵash ret zańnamalyq deńgeıde balalardyń quqyǵyn qorǵaıtyn óńirlik ýákiletti organdardyń mártebesi bekitilip, olardyń ókileti, fýnktsııasy men jumys tetigi naqty aıqyndaldy. Osylaısha memleket bala quqyǵynyń buzylýyn der kezinde anyqtap, ár balany keshendi túrde qorǵaýǵa múmkindik beretin quqyqtyq negiz qalyptastyryp otyr, – dedi Janat Aıtpaeva.
Jańa basqarma qyzmetkerlerine balalary bar memlekettik organdarǵa, mektepterge, balabaqshalarǵa, medıtsınalyq jáne áleýmettik mekemelerge kedergisiz kirip, balalardyń quqyǵynyń saqtalýyn baqylaıtyn quqyq berildi. Olardyń zańdy qyzmetine kedergi keltirgeni úshin ákimshilik jaýapkershilik kózdelgen.
Sondaı-aq megapolıste keıs-menedjment júıesi engizildi. Kómekke muqtaj ár balaǵa keıs-menedjer bekitiledi. Ol otbasyn súıemeldeıtin jeke jospar ázirlep, psıhologtardyń, pedagogterdiń, áleýmettik qyzmetkerlerdiń, medıtsına mamandary men quqyq qorǵaý organy qyzmetkerleriniń jumysyn uıymdastyrady, sondaı-aq barlyq qoldaý sharalarynyń oryndalýyn baqylaıdy.
Janat Aıtpaevanyń aıtýynsha, jumystyń taǵy bir mańyzdy baǵyty – 2026–2030 jyldarǵa arnalǵan «Qazaqstan balalary» tujyrymdamasyn iske asyrý. Sonymen qatar qalada «Almaty – qaýipsiz balalyq shaq» atty mekemearalyq joba iske qosylady. Oǵan polıtsııa, prokýratýra, salalyq basqarmalar, aýdandyq ákimdikter, úkimettik emes uıymdar, eriktiler, sarapshylar men buqaralyq aqparat quraldary qatysady.
- Jańa oqý jylynan bastap mektepte jańa pánder engiziledi. 5–7-synyp oqýshylary «Konstıtýtsııa negizderi» kýrsyn, al 8–9-synyp oqýshylary «Zań men tártip» pánin oqıdy. Sonymen qatar «Jeke qaýipsizdik» baǵdarlamasy tolyq jańartylady. Sabaqta balalarǵa býllıng pen kıberbýllıngke, ınternet-alaıaqtyqqa qarsy turý, jeke derekterin qorǵaý men qaýipti jaǵdaıda durys áreket etýdiń jolyn úırete bastaıdy, - dedi vedomstvo basshysy.
Eske salaıyq, buǵan deıin Almatyda Balalardyń quqyǵyn qorǵaý basqarmasyna jańa basshy taǵaıyndalǵanyn jazǵanbyz.
