Almatyda balalarǵa arnalǵan alǵashqy ǵylym mýzeıi ashylady
ALMATY. KAZINFORM — Sıngapýrda Almaty balalar ǵylymı mýzeıiniń (ACSM) ókilderi men sheteldik seriktester — Science Centre Singapore jáne Kingsmen Creatives Ltd kompanııalarynyń qatysýymen kezdesý ótti.
Almaty ákimdiginiń málimetinshe, taraptar mýzeıdi ashýǵa daıyndyqtyń negizgi kezeńderin talqylady. Joba Ortalyq Azııadaǵy halyqaralyq deńgeıdegi alǵashqy balalar ǵylymı ortalyǵy bolmaq. Mýzeı bıyl maýsym aıynda kelýshilerge esigin aıqara ashady.
Kezdesý barysynda bilim berý mazmunyn ázirleý men mýzeı qyzmetkerlerin daıarlaý jumystaryna erekshe nazar aýdaryldy.
ACSM jobasyn iske asyrý jetekshisi Maıra Turǵanova jobanyń qazirgi jaı-kúıin tanystyrdy.
— Science Centre Singapore-men seriktestik aıasynda Almaty balalar ǵylymı mýzeıine bilim berý baǵdarlamalary boıynsha franshıza jáne ózge de zııatkerlik quqyq berildi. Árbir ekspozıtsııa sıngapýrlyq seriktestermen birlesip ázirlenip, ulttyq erekshelikke beıimdeldi. Olar Aral teńizinen bastap kıiz úı qurylymynyń ǵylymı túsindirmelerdi qamtıdy. Búginde Science Hub ACSM galereıalary men zerthanalary úshin 130-dan astam bilim berý baǵdarlamasy ázirlendi, — dedi Maıra Turǵanova.
Eske salaıyq, Science Centre Singapore — 49 jyldyq tarıhy bar, jyl saıyn 1 mıllıonnan astam adam keletin álemdegi jetekshi ǵylymı-bilim berý ortalyqtarynyń biri. Ortalyq KidsSTOP balalar ǵylymı keńistiginiń operatory sanalady, dál osy model ACSM jobasyn ázirleýge negiz bolǵan.
2024 jyly Qaırat Boranbaevqa tıesili bolǵan «Almaly» saýda ortalyǵynda balalarǵa arnalǵan Ǵylym mýzeıi ashylatyny habarlandy.
Keıin Almatyda TMD aýmaǵyndaǵy alǵashqy Ǵylym mýzeıiniń qurylysy qashan bastalatynyn jazǵanbyz.