Almatyda balalarǵa arnalǵan alǵashqy ǵylym mýzeıi 2026 jyldyń jazynda ashylady
ALMATY. KAZINFORM — Almaty ákimdiginde balalarǵa arnalǵan ǵylym mýzeıi jobasyn júzege asyrý jóninde keńes ótti.
Ákimdik málimetine sáıkes, mýzeı balalarǵa ǵylymdy keńinen nasıhattaıtyn alańǵa aınalady. Joba Singapore Science Centre Global halyqaralyq franshızasy aıasynda Kingsmen Exhibits kompanııasymen birlese júzege asyrylyp otyr. Bolashaq mýzeı bilim berý ortalyǵy ǵana emes, mektep, kolledj jáne ýnıversıtet baǵdarlamalaryna zamanaýı ǵylymı jetistikterdi engizetin platforma bolmaq.
— Búginde buzý jumystary aıaqtalýǵa jaqyn. Sonymen birge jobalaý-smetalyq qujattama ázirlenip, ınjenerlik zertteýler qolǵa alynǵan. Ǵımarat qurylymdaryn seısmıkalyq talaptarǵa sáıkes nyǵaıtý jumystary qarqyn aldy. Sonymen qatar halyqaralyq jáne jergilikti sarapshylardyń atsalysýymen mýzeıdiń bilim berý jáne kórme mazmuny daıyndalyp jatyr. Instıtýtsıonaldyq damý máselesi qarastyrylyp, halyqaralyq áriptespen yntymaqtastyq baǵyttary talqylaný ústinde, — dep habarlady ákimdikten.
Almaty ákimdigi nysannyń qurylys-montajdaý jumystary 2026 jyldyń sáýir aıynda aıaqtalyp, maýsym aıyna saltanatty ashylý rásimi josparlanǵanyn málimdedi.
Eske salaıyq, 2024 jyly Qaırat Boranbaevqa tıesili bolǵan «Almaly» saýda ortalyǵynda balalarǵa arnalǵan Ǵylym mýzeıi ashylatyny habarlandy.
Keıin Almatyda TMD aýmaǵyndaǵy alǵashqy Ǵylym mýzeıiniń qurylysy qashan bastalatynyn jazǵanbyz.