Almatyda balalardyń paıdasyna boryshkerlerden 500 mln teńge alıment óndirildi

ALMATY. KAZINFORM – Alıment tóleýden jaltarǵan ákelermen kúres júrgizý, balalardyń quqyǵyn qorǵaý máselesi Ádilet departamentiniń basty mindetteriniń biri. Almaty qalasy Ádilet departamentiniń basshysy Balaıym Kesebaevanyń aıtýynsha, jekemenshik sot oryndaýshylarynyń qaraýynda 22 688 alımenttik is bar. Onyń tek 70-i naqty oryndaldy, 2 879-y boıynsha aıaqtaldy, al 1 000 is problemaly bolyp qalyp otyr. 

«Jyl basynan beri alıment alýshylardyń paıdasyna 500 mıllıonnan astam teńge (568 361 752 teńge) óndirildi. Osy shara aıasynda alıment sanatyndaǵy boryshkerlerdiń 5 jyljymaıtyn múliginen jáne 37 kólik quraldarynan bereshek óndirilip alyndy», - dep atap ótti spıker óńirlik kommýnıkatsııalar qyzmetinde ótken baspasóz máslıhatynda. 

Alıment tólemeýdiń negizgi sebebi – boryshkerlerdiń jumysqa ornalaspaýy, turaqty tabystyń bolmaýy. Sol sebepti jeke sot oryndaýshylary men jumyspen qamtý ortalyǵy úsh jumys jármeńkesin uıymdastyrdy. 

«Osy is-sharalardyń arqasynda 234 boryshker jumyspen qamtyldy, bul alıment óndirip alý tıimdiligin edáýir arttyrdy. Eger boryshker jumysqa ornalasýdan bas tartsa, ony ákimshilik nemese qylmystyq jaýapkershilik kútedi», - dep tolyqtyrdy spıker.

Aıta keteıik, Almaty qalasynda 24 memlekettik jáne 291 jekemenshik sot oryndaýshysy bar, olardyń negizgi mindeti – sot aktilerin májbúrli túrde oryndaý.