Almatyda balalardyń quqyǵyn qorǵaý jónindegi jańa basqarma qurylady

ALMATY. KAZINFORM – Almaty qalasynyń ákimi Darhan Satybaldy qala balalar býllıngine qarsy qandaı jumystar atqarylyp jatqanyn aıtty.

Megapolıs basshysy býllıng jáne kıberbýllıng máselelerimen aınalysatyn jańa vedomstvo qurylatynyn atap ótti.

- Býllıng máselesi bizdiń baqylaýymyzda. Ár mektepte óziniń psıholog mamany bar. Senim telefony jumys isteıdi. Bıyl ata-analardyń ótinishi boıynsha 2 myńǵa jýyq kezdesý ótkizdik, onyń 200 jaǵdaıynda býllıng bolǵany rastaldy. Bul – ótkir suraqtardyń biri, sondyqtan kelesi jyly jańa basqarma qurý týraly sheshim qabyldadyq. Ol balalardyń quqyqtaryn qorǵaý basqarmasy bolady, atyn áli de naqtylaımyz. Qazir bul qyzmetter bilim basqarmasyny júktelgen. Biraq osy máselege erekshe kóńil bólgimiz keledi. Sebebi qalamyz úlken, 355 myń oqýshy bar, – dedi ákim.

Eske salaıyq, qazir Almaty qalasynda 24 basqarma bar. Buǵan deıin ekonomıka basqarmasy men qarjy basqarmasy biriktirilip, ekonomıka jáne qarjy basqarmasy qurylady. Odan bólek qalalyq mobıldilik basqarmasy eki derbes vedomstvoǵa bólindi.

Sondaı-aq Astanada balalardyń quqyqtaryn qorǵaý jónindegi jańa basqarma qurylatynyn jazǵanbyz.