Almatyda Balalardy qorǵaý kúni qalaı atap ótiledi
ALMATY. KAZINFORM – 1 maýsym kúni Almatyda Halyqaralyq balalardy qorǵaý kúnine arnalǵan merekelik is-sharalar ótedi.
Álııa Moldaǵulova men Mánshúk Mámetova atyndaǵy saıabaqta 1 maýsym kúni saǵat 12:00–16:00 aralyǵynda «BALAFEST – 2026» festıvali ótedi.
Ár qatysýshy Bala QR — festıvaldiń jeke marshrýttyq pasportyn alady. Balalar taqyryptyq aımaqtardan ótip, tapsyrmalar oryndap, Bala Coins jınap, ǵylym, shyǵarmashylyq, sport, AI jáne zamanaýı tehnologııalar álemin kezeń-kezeńimen zertteıtin bolady.
Festıval baǵdarlamasynda robototehnıka, ǵylymı eksperımentter, digital-art, kıbersport, sheberlik sabaqtary, sporttyq belsendilik aımaqtary, syılyqtar, fotozonalar bar.
Odan bólek merekelik baǵdarlama aıasynda Alataý aýdanyndaǵy 100 bala tsırkke barady.
Al Almaly aýdanynda saǵat 11:00-de Prokofev pen Dúısenov júrginshiler kósheleriniń qıylysynda Halyqaralyq balalardy qorǵaý kúnine arnalǵan merekelik kontsert ótedi.
Áýezov aýdanynda merekelik baǵdarlama saǵat 10:00-de Family Park-ta (Ótegen batyr kóshesi, 57A) fleshmob pen alyp qýyrshaqtar jáne ertegi keıipkerleriniń sherýimen bastalady. Saǵat 11:00-de osy jerde N.Sats atyndaǵy teatr balalarǵa arnalǵan teatrlandyrylǵan oıyn-saýyq baǵdarlamasyn usynady. Saǵat 11:40-ta Halyqaralyq balalardy qorǵaý kúnine arnalǵan saltanatty is-shara ótedi.
Sonymen qatar saǵat 11:00-de «Saryarqa» skverinde «Sport dostyq alańy» aktsııasy aıasynda dzıýdo jáne asyq atýdan týrnırler, sondaı-aq baǵaly syılyqtar tabystalatyn sporttyq mereke uıymdastyrylady.
Saǵat 14:00-de Polıtehnıkalyq kolledjde «Parasatty azamat» taqyrybyndaǵy «Urpaqtar sabaqtastyǵy» tennıs týrnıri ótedi. Al saǵat 10:00-de №141 mektep bazasynda mektepke deıingi bilim berý uıymdarynyń tárbıelenýshileri qatysatyn «Juldyzdy sát» qalalyq festıvali bolady.
Bostandyq aýdanynda halyqtyń áleýmettik osal sanatyndaǵy balalarǵa arnalǵan arnaıy merekelik baǵdarlama ázirlengen. 30 mamyr men 2 maýsym aralyǵynda turmysy tóımen jáne kópbalaly otbasylardan shyqqan balalar, sondaı-aq erekshe qajettiligi bar balalar tsırkke, haıýanattar baǵyna, «Fantasy World» oıyn-saýyq saıabaǵyna, Á. Qasteev atyndaǵy Memlekettik óner mýzeıine, qýyrshaq teatry men kınoteatrlarǵa tegin bara alady.
Jetisý aýdanynda «Gúlder» saıabaǵynda saǵat 10:00-de shamamen 500 qatysýshyny qamtıtyn Damu Bala Fest festıvali ótedi. Sonymen qatar aýdanda «Kitap áleminde» chellendji aıasynda qazaqstandyq jazýshylarmen kezdesýler, mánerlep oqý baıqaýlary jáne súıikti kitaptardy talqylaý uıymdastyrylady.
Medeý aýdanynda saǵat 10:00-de Oqýshylar saraıynyń ortalyq alańynda «Shattyqqa toly balalyq» merekelik is-sharasy ótedi. Saǵat 15:00-de Qazaq memlekettik fılarmonııasynda shamamen 500 balaǵa arnalǵan «Ǵajaıyp balalar álemi» gala-kontserti uıymdastyrylady.
Naýryzbaı aýdanynda birqatar merekelik is-shara josparlanǵan. «Shuǵyla» shaǵyn aýdany, 347 mekenjaıyndaǵy amfıteatrda saǵat 15:00-de «Shyńǵa órle, bıikke samǵa!» áleýmettik klýbynyń qatysýymen Halyqaralyq balalardy qorǵaý kúnine arnalǵan merekelik kontsert ótedi. Sonymen qatar balalarǵa arnalǵan kıno kórsetilimi uıymdastyrylady.
Túrksib aýdanynda «Taza Qazaqstan» ekologııalyq tujyrymdamasy aıasynda sýdaǵy qaýipsizdik pen jol qozǵalysy erejelerine arnalǵan «Balalyq shaq dosy» aýdandyq taqyryptyq chellendji ótedi. Іs-shara saǵat 10:00-de №59 mektep-gımnazııasynda uıymdastyrylady. Osy kúni saǵat 10:00-de Saýranbaev kóshesindegi Arbatta «Balalyq shaq» aýdandyq merekesi ótedi.
Eske salaıyq, Almatyda Balalardy qorǵaý kúnine oraı tegin medıtsınalyq tekserýden ótýge bolatynyn jazǵanbyz.
