Almatyda balalardan kókjótel anyqtaldy

ALMATY. KAZINFORM – Almaty qalasynda osy jyldyń basynan beri 1 jasqa deıingi 4 baladan kókjótel anyqtaldy. Bul týraly qalalyq sanıtarlyq-epıdemıologııalyq baqylaý departamentiniń basshysy Qasymhan Alpysbaıuly málim etti.

«Syrqat anyqtalǵan balalarǵa kókjóteldiń vaktsınasy egilmegen. Onyń ishinde 3 balanyń ata-anasy ekpe salýdan bas tartsa, 1 balada medıtsınalyq qarsy kórsetilim bolǵan. Kókjótel oshaqtarynda naýqaspen baılanysta bolǵan 34 adam tekserildi, olar dertten saý bolyp shyqty. Barlyq baılanysta bolǵan adamdar emhanalardyń medıtsınalyq baqylaýyna alyndy», - dedi ol.

Kókjótel – Bordetella tuqymdas bakterııalar týdyratyn juqpaly aýrý. Ony juqtyrǵan adam býlyǵyp jóteledi jáne ol jótel uzaq ýaqyt ketpeı qoıady.

«Kókjótel, ásirese, jańa týǵan jas sábılerge aýyr tıedi. Naýqasta qarapaıym sýyq tııýdiń belgileri paıda bolady. Birte-birte jótel kúsheıip, bala qyzaryp, kógerip, býlyǵyp jóteletin bolady. Osy jótel kezinde mıdyń qan aınalymy buzylady. Otteginiń jetispeýinen psıhıkanyń buzylýy jáne ártúrli dárejedegi aqyl-oı kemistigi paıda bolýy yqtyımal», - deıdi Qasymhan Alpysbaıuly.

Kókjóteldiń ınkýbatsııalyq kezeńi 3 kúnnen 14 kúnge deıin sozylady. Eń tıimdi profılaktıkalyq shara – ulttyq egý kúntizbesi boıynsha balalar arasynda úsh rettik egý júrgizý. Balalarǵa vaktsınatsııa ata-anasynyń ruqsatymen ǵana júrgiziledi.