Almatyda balalar jyl basynan beri 623 jol-kólik oqıǵasyna ushyraǵan

ALMATY. KAZINFORM – Almaty qalasy Polıtsııa departamentiniń resmı ókili Saltanat Ázirbek jyl basynan beri balalardyń 623 jol-kólik oqıǵasyna ushyraǵanyn habarlady.

Polıtsııa ókili megapolıste jyl basynan beri mopedterdiń 359 jol-kólik oqıǵasyna ushyrǵanyn aıtty. Onyń saldarynan 364 adam túrli dene jaraqattaryn alyp, 6 adam qaıtys bolǵan. Al elektr samokattarynyń qatysy bar 47 jol-kólik oqıǵasynda 51 adam túrli dene jaraqattaryn alǵan.

- 16 men 18 jas aralyǵyndaǵy kámeletke tolmaǵandarǵa jol boıynda elektr samokattardy júrgizýge tyıym salynady. Bul úshin ÁQBtK-niń 620-baby “Jol qozǵalysyna qatysýshylarǵa qoıylatyn ózge de talaptardy buzý” boıynsha ákimshilik jaýapkershilik kózdelgen. Zańdy ókilder QR ÁQBtK-niń 127-baby – kámeletke tolmaǵan adamdy tárbıeleý, oqytý, quqyqtary men múddelerin qorǵaý jónindegi mindetterdi oryndamaý boıynsha ákimshilik jaýapkershilikke tartylady, - dedi Saltanat Ázirbek.

Sondaı-aq polıtsııa ókili jyl basynan beri jol qozǵalysy erejelerin buzǵany úshin 15 myńnan astam moped júrgizýshisi, sondaı-aq samokat tizgindegen 12 myńnan astam adam ákimshilik jaýapkershilikke tartylǵanyn atap ótti.