Almatyda balalar zardap shegetin jol apattary 60 paıyzǵa artqan
ALMATY. KAZINFORM — Jyl basynan beri Almaty qalasynda 4 myńnan astam jol-kólik oqıǵasy bolǵan.
Qalalyq polıtsııa departamentiniń málimetinshe, jol apaty saldarynan 5 myńnan astam adam zardap shekti jáne 45 adam qaıtys boldy. Sondaı-aq polıtsııa balalar zardap shegetin jol-kólik oqıǵalarynyń sany shamamen 60%-ǵa artqanyn atap ótti.
— Jol-kólik oqıǵalarynyń negizgi sebepteri — jyldamdyqty asyrý, araqashyqtyqty saqtamaý, manevr jasaý men jaıaý júrginshiler ótkelinen ótý erejelerin buzý. Mundaı jaǵdaılardyń barlyǵyn jol qozǵalysy erejelerin qatań saqtaı otyryp, boldyrmaýǵa bolady. Júrgizýshiler men jaıaý júrginshilerdi barynsha saq bolýǵa shaqyramyz. Qalamyzdyń joldaryn qaýipsiz etý úshin bárimiz birge áreket eteıik, — dedi Anyqtaý basqarmasy bóliminiń bastyǵy Erjan Shaıhıev.
Eske salaıyq, birneshe aı buryn Almatyda júk kóligi 7 jasar qyzdy basyp ketti.
