Almatyda balalar úıinen ketip qalǵan eki qyz izdestirilip jatyr
ALMATY. KAZINFORM — Almatyda eki tárbıelenýshi balalar úıinen qashyp ketken.
Volonterler málimetinshe, izdestirilip jatqan qyzdardyń biriniń jasy 14-te, ekinshisi 16-da.
Almaty qalasynyń polıtsııa departamenti balalar mekemesinen eki tárbıelenýshiniń óz betimen ketip qalý deregi boıynsha Bostandyq aýdandyq polıtsııa basqarmasy izdestirý isin qozǵaǵanyn habarlady.
— Buǵan deıin de kámeletke tolmaǵandar mekemeden birneshe ret ketip qalǵan, ár joly olar polıtsııa qyzmetkerleriniń kúshimen tabylyp, qaıtarylǵan. Qazirgi ýaqytta olardyń qaıda ekenin anyqtaýǵa baǵyttalǵan jedel-izdestirý sharalary kesheni júrgizilip jatyr, — dep habarlady departamentten.
Sonymen qatar qalalyq polıtsııa osyǵan uqsas jaǵdaılar boıynsha mekeme basshylyǵymen profılaktıkalyq jáne túsindirý jumystary buǵan deıin de júrgizilgenin málimdedi
— Tárbıelenýshilerge baqylaýdy kúsheıtý qajettigi eskertilgen, — dep habarlady polıtsııa.
Eske salaıyq, «Baǵanashyl» balalar úıiniń tárbıelenýshileri jóndeý kezinde Almatyda oqýyn jalǵastyratynyn jazǵanbyz.