Almatyda balalar merekesine oraı tegin medıtsınalyq tekserýler men aktsııalar ótip jatyr
ALMATY. KAZINFORM – Halyqaralyq balalardy qorǵaý kúnine oraı Almaty qalasynyń medıtsınalyq uıymdarynda balalar men jasóspirimderge arnalǵan aýqymdy profılaktıkalyq jáne merekelik is-sharalar uıymdastyrylýda.
Qalalyq densaýlyq saqtaý uıymdarynyń málimetinshe, aktsııa aıasynda balalar men olardyń ata-analaryna pedıatrlar, stomatologtar, travmatologtar, ınfektsıonıster, nevropatologtar, otorınolarıngologtar, akýsher-gınekologtar jáne basqa da beıindi mamandar tegin keńes berýde.
Іs-sharalarǵa shtattan tys bas mamandar, jetekshi sarapshylar men ǵylymı qyzmetkerler qatysyp jatyr.
Múgedektigi bar jáne dıspanserlik esepte turǵan balalarǵa erekshe nazar aýdarylǵan.
– Erekshe qajettilikteri bar balalar úshin úı jaǵdaıynda kóshpeli tekserýler uıymdastyrylyp, konsýltatsııalyq kómek kórsetý jumystary júrgizilýde, – delingen habarlamada.
Sonymen qatar qaladaǵy medıtsınalyq mekemelerde profılaktıkalyq aktsııalar, ata-analar men jasóspirimderge arnalǵan kezdesýler, sýret baıqaýlary, sporttyq jarystar jáne mádenı is-sharalar ótkizilýde.
Bastamaǵa salaýatty ómir saltyn qalyptastyrý ortalyqtary men Jastar densaýlyq ortalyqtary da qosylǵan.
Balalardy qorǵaý kúni aıasynda Almatyda birqatar jańa quzyretter ortalyqtary da ashylady.
Atap aıtqanda, Qalalyq balalar klınıkalyq ınfektsııalyq aýrýhanasynda Balalar ınfektsııalyq aýrýlary boıynsha quzyretter ortalyǵy jumysyn bastaıdy.
– Ortalyqtyń qyzmeti mamandandyrylǵan medıtsınalyq kómekti jetildirýge, telemedıtsına tehnologııalaryn damytýǵa, mamandardyń biliktiligin arttyrýǵa jáne úzdik klınıkalyq tájirıbelerdi engizýge baǵyttalady, – dep habarlady uıymdastyrýshylar.
Sondaı-aq Balalarǵa shuǵyl medıtsınalyq kómek kórsetý ortalyǵynda jáne №2 qalalyq balalar klınıkalyq aýrýhanasynda da jańa quzyretter ortalyqtaryn ashý josparlanyp otyr.
Іs-sharalardyń negizgi maqsaty – balalar men jasóspirimderdiń fızıkalyq, psıhıkalyq jáne reprodýktıvtik densaýlyǵyn nyǵaıtý, aýrýlardyń aldyn alý jáne densaýlyqqa jaýapkershilikpen qaraý mádenıetin qalyptastyrý.
Aıta keteıik, Qazaqstanda balalardy qorǵaý baǵytynda qandaı bastamalar júzege asyp jatqanyn mynaý siltemeden oqı alasyz.
