Almatyda balalar dárigerleriniń konferentsııasy ótti
ALMATY. KAZINFORM – Almaty qalasynda «Pedıatrııa men balalar hırýrgııasynyń zamanaýı máseleleri: tájirıbe, ınnovatsııalar jáne jetistikter» taqyrybynda ǵylymı-praktıkalyq konferentsııa ótti. Sondaı-aq doktoranttarǵa, magıstranttar men rezıdentterge arnalǵan «Jas zertteýshi: qazirgi zamanǵy pedıatrııa men balalar hırýrgııasynyń syn-qaterleri men damý perspektıvalary» atty jas ǵalymdar mektebi uıymdastyryldy.
Densaýlyq saqtaý mınıstrligi málimetinshe, konferentsııanyń jumysyna Qazaqstan men shet elderden 100-den astam spıker qatysty. Іs-shara gıbrıdti formatta ótti jáne 1500-den astam dárigerdi - pedıatrlardy, balalar hırýrgtaryn, ǵalymdar men jas mamandardy biriktirdi.
Konferentsııa ǵylymı tájirıbe almasýǵa, klınıkalyq praktıkany damytýǵa jáne elimizdiń pedıatrııalyq qyzmetiniń kadrlyq áleýetin nyǵaıtýǵa baǵyttalǵan dástúrli jyl saıynǵy is-sharaǵa aınaldy. Otyrys barysynda balalarǵa medıtsınalyq kómekti uıymdastyrýdyń ózekti máseleleri, dıagnostıka men emdeýdiń zamanaýı ádisteri, pedıatrııa men balalar hırýrgııasyna ınnovatsııalyq tehnologııalardy engizý, túrli patologııasy bar balalardy ońaltý jáne áleýmettik beıimdeý máseleleri qaraldy.
Balalardyń densaýlyǵyn saqtaý salasynda aqparattyq tehnologııalar men tsıfrlyq sheshimderdi damytýǵa erekshe nazar aýdaryldy. Konferentsııa jumysynyń ekinshi kúni Jas ǵalymdar mektebi ótti, onyń sheńberinde doktoranttar, magıstranttar men rezıdentter pedıatrııa men balalar hırýrgııasynyń ózekti máseleleri boıynsha 50-ge jýyq aýyzsha jáne stendtik baıandamalar usyndy. Konferentsııany ashqan qatysýshylarǵa QR DSM Ana men bala densaýlyǵyn saqtaý departamentiniń dırektory Maǵrıpa Embergenova, S.DJ Asfendııarov atyndaǵy QazUMÝ prorektory Svetlana Sultanǵazıeva jáne pedıatrııa jáne balalar hırýrgııasy ǵylymı ortalyǵynyń Basqarma tóraǵasy Abaı Qusaıynov quttyqtaý sóz sóılep, konferentsııanyń bilim almasý jáne jas mamandardy qoldaý alańy retindegi mańyzyn atap ótti.
– Jas ǵalymdardyń qatysýynsyz zamanaýı medıtsına ǵylymy men praktıkasyn damytý múmkin emes. Biz bul is-sharany jyl saıyn olardyń ǵylymı áleýetin keńeıtý jáne zertteýlerdi klınıkalyq tájirıbege biriktirý úshin ótkizemiz. Bıyl jas qatysýshylar daıarlyqtyń joǵary deńgeıin, mazmundy baıandamalar men praktıkalyq usynystardy kórsetti. Biz jastarymyzdy maqtan tutamyz – olar otandyq medıtsınanyń bolashaǵy, - dep atap ótti PBHǴO-nyń Basqarma tóraǵasynyń ǵylymı jáne ınnovatsııalyq qyzmet jónindegi orynbasary Lázzat Manjýova.
Ortalyq rezıdentýrasynyń túlekteri búginde Qazaqstannyń barlyq óńirinde jumys istep, elimizdiń balalar medıtsınasynyń damýyna úles qosyp jatyr.
Іs-sharany Densaýlyq saqtaý mınıstrliginiń qoldaýymen Pedıatrııa jáne balalar hırýrgııasy ǵylymı ortalyǵy jáne «Pedıatrlar Odaǵy» qoǵamdyq birlestigi uıymdastyrdy.
Buǵan deıin elimizde ana men bala densaýlyǵyn jaqsartý úshin qandaı jumys atqarylǵanyn jazǵan bolatynbyz.