Almatyda balalar baıqaýyn uıymdastyrýshy alaıaqtyq jasady degen kúdikke ilindi
ALMATY. KAZINFORM – Almaty qalasynyń Polıtsııa departamenti kámeletke tolmaǵan balalardyń ata-analarynan halyqaralyq baıqaýǵa qatysý syltaýymen aqsha jınaý deregi boıynsha sotqa deıingi tergeý jumystaryn bastady.
Polıtsııa málimetine sáıkes, 2024 jyldyń jeltoqsan aıynda jarııalanǵan is-sharanyń uıymdastyrýshysy shetelde ótedi degen baıqaýǵa qatysýdy usynyp, ata-analardan qarjy jınaǵan. Alaıda baıqaý ótkizilmegen, balalar shetelge shyqpaǵan jáne qarjy qaıtarylmaǵan.
- Qazirgi tańda eldiń birneshe óńirinen azamattardan aryzdar tirkeldi. Materıaldyq shyǵyn kólemi anyqtalý ústinde. Kúdikti ustalyp, ýaqytsha ustaý ızolıatoryna qamaldy. Keshendi tergeý amaldary júrgizilip jatyr, - dep habarlady departamentten.
Sonymen qatar tártip saqshylary balalardyń saparyna qatysty kelisim jasaǵanda qyraǵylyq tanytýǵa jáne qandaı da bir usynystyń zańdylyǵyna kúmán týyndaǵan jaǵdaıda polıtsııaǵa júginýge shaqyrdy.
Eske salaıyq, buǵan deıin alaıaqtyqpen 6 adamnyń 63 mln teńgesin jymqyrǵan kúdikti Reseıde ustalǵanyn jazǵanbyz.