Almatyda balalar arasynda jelsheshektiń asqynǵan túri jıilep ketti

ALMATY. KAZINFORM — Almatyda 2025 jyldyń toǵyz aıynda balalar arasynda jelsheshekpen aýyrǵandar sany 38,8% ósken.

Bul týraly Qalalyq balalar klınıkalyq juqpaly aýrýlar aýrýhanasynyń dırektory Erjan Seralın aıtty.

Onyń málimetinshe, bıyl qalada 183 bala ártúrli aýyrlyq dárejesimen aýrýhanaǵa jatqyzylǵan. Kúrdeli formalar sany byltyrmen salystyrǵanda 40,9% artqan, onyń ishinde ortalyq júıke júıesi men tynys alý joldarynyń zaqymdanýy kóbeıgen.

— Jelsheshek kóbine mektepke deıingi jáne bastaýysh synyp jasyndaǵy balalarda (jalpy syrqattanǵandardyń 61,7%-y) tirkeledi. Sebebi bul ınfektsııaǵa qarsy vaktsına Ulttyq egý kúntizbesine engizilmegen, sondyqtan ujymdyq ımmýnıtet tek aýrýdy ótkergenderdiń esebinen qalyptasady, — dedi Erjan Seralın.

Aýrýhana basshysynyń aıtýynsha, 1-14 qazan aralyǵynda aýrýhananyń jansaqtaý jáne qarqyndy terapııa bólimshesine 14 bala túsken. Olardyń arasynda ekijaqty pnevmonııa, jedel ishek ınfektsııasy, tyrysý sındromy jáne tynys alý jetkiliksizdigimen aýyrǵandar bar.

— Keıbir balalar aýrýhanaǵa tym kesh ákelinedi, ata-analar aýrýdyń 8-10-kúni ǵana júginedi. Bul jaǵdaıdan emdeý qıyndap, asqynyp ketedi, — dedi Seralın.

Eske salaıyq, buǵan deıin Almatyda JRVI juqtyrǵandardyń sany 20 myńǵa jaqyndaǵanyn jazǵanbyz.