Almatyda balalar alańy men avtoturaq úshin jańa talaptar engizildi
ALMATY. KAZINFORM – Almatyda kóriktendirýdiń jańa erejesi bekitildi, onda qurylys jumystaryn júrgizý, aýmaqty jınaý jáne abattandyrý kezinde tazalyq saqtaý men kútip ustaýdyń negizgi aspektileri kórsetildi. Qujatta jedel damyp kele jatqan qalanyń jaıy eskerilgen.
Atap aıtqanda, pýnkttiń biri balalar men sport alańyn kútip ustaýǵa qatysty. Almatynyń kommýnaldyq ınfraqurylymdy damytý basqarmasynyń basshysy Dýlat Áshkenovtyń aıtýynsha, alańdy tıisti tehnıkalyq jaǵdaıda ustaý jáne qys mezgilinde qardan únemi tazalaý boıynsha talap engizilgen. Alańdaǵy qorshaýlar men qurylys jylyna keminde bir ret syrlanýy kerek.
«Balalar men sport alańynyń ıesi qaýipsizdikti jáne turaqty túrde kútip ustaýdy qamtamasyz etýge tıis. Qaýipsizdik maqsatynda nysandardy tranzıttik jaıaý júrginshiler qozǵalysynan, ótpelerden, burylys alańdarynan, qonaq turaqtarynan jáne qoqys alańdarynan oqshaýlaý qajet. Balalar alańyna kireberisti jol men kóshe jaqtan uıymdastyrýǵa tyıym salynady», - dedi D.Áshkenov.
Oıyn alańdaryn jańartý kezinde jaraqattanbas úshin alańnyń aýmaǵynda tamyrlardyń shyǵyp turǵanyn nemese tómen butaqtardyń, eski, kesilgen jabdyq qaldyǵynyń, sondaı-aq temir bógetterdiń bolmaýyna mán beriledi. Іrgeles aýmaqtardy rekonstrýktsııalaý kezinde balalar alańdary jumys júrgizilip jatqan jer men qurylys materıaldaryn saqtaý oryndary oqshaýlanady.
Sonymen qatar avtoturaq aýmaqtary úshin jańa normalar engizilýde. Ózderińizge málim, qalada avtokólikti qysqa jáne uzaq merzimge qoıý, kóshe boıynda, «qalta» túrindegi joldyń jıegine qoıý syndy avtoturaqtyń san túri bar.
Jalpy paıdalanymdaǵy jerler men aýla aýmaǵyn josparlaý kezinde kógaldy avtoturaqqa aınaldyrmas úshin fızıkalyq kedergiler ornatý qajet. Buǵan qosa, kvartal men aýla ishindegi jolǵa temirbeton blok, baǵana, qorshaý jáne basqa da qurylymdy óz betinshe ornatýǵa tyıym salynady. Úı mańyndaǵy aýmaqta avtomobılderdiń trotýarda, balalar alańynda, kógalda jáne konteınerlik alańda toqtaýyna jáne qoıýyna ruqsat joq. Buzylyp, júrmeı turǵan kólikti qoıýǵa tyıym salynady.
Esterińizge sala keteıik, 2024 jyly 19 shildede VIII saılanǵan máslıhattyń kezekten tys HHІ sessııasynda depýtattar Almaty qalasy aýmaǵyn kóriktendirýdiń jańa erejesin bekitti. Bul is-sharalar «Taza Qazaqstan» respýblıkalyq aktsııasynyń maqsatna sáıkes keletin qaýipsiz, yńǵaıly ári ekologııalyq jaıly qalalyq orta qurýǵa baǵyttalǵan.
