Almatyda BALAFEST festıvali ótti
ALMATY. KAZINFORM – Almatyda halyqaralyq balalardy qorǵaý kúnine arnalǵan «BALA FEST. JARYQ SKILL FEST» festıvali ótti. Merekelik sharaǵa 5 myńnan astam bala qatysty.
1 maýsym – Halyqaralyq balalardy qorǵaý kúninde Almaty - balalyq shaqtyń, qýat pen shabyttyń ortasyna aınaldy. Merekege oraı uıymdastyrylǵan BALA FEST. JARYQ SKILL FEST festıvali arqyly búldirshinder jarqyn, batyl, meıirimdi ári kreatıvti qalany kóre aldy.
Іs-shara Álııa Moldaǵulova men Mánshúk Mámetova atyndaǵy saıabaqta uıymdastyryldy.
Almaty qalasynyń ákimi Darhan Satybaldy festıvalge kelip, búldirshindermen júzdesti.
– Biz sanaly da talantty ári ár isine jaýapty jańa urpaqty qalyptastyratyn bastamalardy qoldaımyz. Almaty – ár bala ózine senetin jáne armanyna nyq qadammen jetetin qala. Biz jaı ǵana qolaıly orta emes, árbir bala óz áleýetin ashyp, armanynyń mańyzdy ekenin jáne múmkindikterdiń bar ekenin túsinetin bolashaqty qalyptastyryp jatyrmyz dep sanaımyn, - dedi festıvalge qatysqan Darhan Satybaldy.
Almaty ákimdiginen málim etkendeı, festıval JARYQ dep atalatyn bes taqyryptyq beket formatynda uıymdastyryldy. Ondaǵy árbir beket bala damýynyń mańyzdy qyrlaryn beıneleıdi. Aıtalyq, Jastar – tehnologııa men ınnovatsııany, Arman – arman men qııal álemin, Rukh – rýhanııat pen tarıhty, Yntalyq – óner men shyǵarmashylyqty, Qabilet – mamandyqtarmen tanysý jáne kásibı baǵyt-baǵdardy beınelegen.
Festıvaldiń basty maqsaty – balalarǵa qyzyqty ári paıdaly edutainment (oıyn arqyly oqytý) ádisin engizý. Bul ádis balalarǵa jańa bilimdi ala otyryp ony qýanysh pen ómirlik tájirıbege aınaldyra alatyn tıimdi tásil sanalady. Ásirese Qabilet beketi erekshe áser qaldyrdy.
Bul – Jumysshy mamandyqtar jyly aıasynda uıymdastyrylǵan alań. Munda balalar túrli kásippen tanysyp qana qoımaı, ózderi de tájirıbe jasap, qol eńbegimen aınalysyp kórdi. Osyndaı bastamalar arqyly eńbekke degen qurmet pen kez kelgen kásiptiń qadirin bala jasynan boıǵa sińirýge jol ashylady.
Qaladaǵy shyǵarmashylyq ortalyqtarynan, Oqýshylar saraıy men mýzyka mektepterinen kelgen balalar daıyndaǵan sheberlik saǵattary men perfomanstary festıvalge jańa boıaý qosty. Balalardyń óz qolymen jasaǵan óneri men kreatıvi myńdaǵan kórermendi shabyttandyrdy.
– Almaty qalasynda qosymsha bilim berýge erekshe basymdyq beriledi. 2023–2029 jyldarǵa arnalǵan Jol kartasyna sáıkes, bul salaǵa bólinetin qarjy jyl saıyn artty otyr. Qazir qaladaǵy 216 mektepte 309 myńnan astam bala bilim alyp jytyr. Olardyń 224 myńnan astamy qosymsha bilimmen qamtylǵan. Bul baǵytta 19 memlekettik uıym, 122 jekemenshik ortalyq (memlekettik tapsyrys boıynsha) jáne mektep janyndaǵy úıirmeler jumys isteıdi, - dep habarlady ákimdikten.
2025 jyly memlekettik uıymdarda 8,6 mıllıard teńge (2024 jyly – 6,1 mlrd), al jekemenshik ortalyqtarda 3,1 mıllıard teńge (2024 j. – 2,3 mlrd) bólý kózdelgen. Bul qarajat ǵylymnan bastap ekologııa, óner, sport jáne tilge deıingi jeti baǵytty qamtıtyn 11 myńnan astam balany qamtýǵa múmkindik beredi.
Eske salaıyq, «Almaty BALAFEST» festıvali alǵash ret Memleket basshysynyń qatysýymen 2022 jyly Balalar jyly aıasynda ótken bolatyn.