Almatyda balabaqsha taraqandarǵa qatysty vıdeodan keıin jabyldy

ALMATY. KAZINFORM – Almaty bilim basqarmasy №29 bóbekjaı-balabaqsha ashanasynda taraqandardyń órip júrgeni týraly vıdeo taraǵannan keıin júrgizilgen tekseristiń nátıjesin jarııalady.

– Áýezov aýdanynyń sanıtarlyq-epıdemıologııalyq qyzmeti júrgizgen tekseristiń nátıjesinde «№29 balabaqsha» kommýnaldyq memlekettik qazynalyq kásiporny mekemesiniń qyzmeti anyqtalǵan zańbuzýshylyqtar men kemshilikter joıylǵanǵa deıin toqtatyldy. Mektepke deıingi uıym ishinde dezınfektsııalaý jáne jaǵdaıdy sanıtarlyq talaptarǵa sáıkestendirý boıynsha keshendi sharalar júrgizilip jatyr, - dep habarlady vedomstvo.

Tárbıelenýshiler ýaqytsha qaladaǵy basqa balabaqshalarǵa ornalastyryldy. Mekeme jumysy barlyq talap oryndalyp, baqylaýshy organdardyń ruqsaty alynǵannan keıin qaıta jandanady.

Eske salaıyq, buǵan deıin áleýmettik jelide Almaty bilim basqarmasyna qarasty №29 bóbekjaı-balabaqshada taraqandar júrgeni týraly vıdeo taraǵan edi.

Qalalyq bilim basqarmasynyń málimetinshe, vıdeony shamamen 2025 jylǵy qyrkúıek aıynda «Batyr KZ» kúzet uıymynyń qyzmetkeri túsirgen.

Vedomstvonyń habarlaýynsha, balabaqsha men «Óndiristik kooperatıv» JShS arasynda jasalǵan kelisimshart aıasynda ǵımaratta dezınfektsııa jáne deratızatsııa jumystary toqsan saıyn júrgizilip otyrady. Sondaı-aq balabaqsha mańynda ornalasqan qoqys jáshikteri jándikterdiń paıda bolýyna jáne taralýyna sebep bolýy múmkin.