Almatyda bala jutyp qoıǵan úsh magnıt asqazan men ishekti jalǵap jibergen
ALMATY. KAZINFORM — Almatyda 5 jastaǵy bala úsh magnıt jutyp qoıyp, sırek kezdesetin qaýipti asqynýǵa tap boldy. Magnıtterdiń áserinen onyń asqazany men ash isheginiń arasynda patologııalyq baılanys — magnıttik jylankóz qalyptasqan.
Oqıǵa Almatydaǵy № 2 balalar qalalyq klınıkalyq aýrýhanasynda anyqtaldy.
Densaýlyq saqtaý mınıstrliginiń habarlaýynsha, magnıtter uzaq ýaqyt boıy balanyń asqazan-ishek jolynda bolǵan. Kúshti magnıttik tartylys saldarynan asqazandaǵy bir magnıt pen ash ishektegi eki magnıt múshelerdiń qabyrǵalary arqyly bir-birine tartylǵan.
Ota kezinde dárigerler asqazan men ash ishek arasynda jylankóz paıda bolǵanyn anyqtady. Uzaq ýaqytqa sozylǵan qysym tinderdiń zaqymdanyp, oıylǵan.
Hırýrg, Almatydaǵy № 2 BQKA dırektorynyń orynbasary Marat Qaptaǵaevtyń aıtýynsha, ota bastapqyda laparoskopııalyq ádispen bastalǵan. Alaıda zaqymdanýdyń sıpaty anyqtalǵannan keıin balanyń qaýipsizdigi úshin hırýrgtar ashyq ota jasaýǵa sheshim qabyldaǵan.
— Jylankóz joıylyp, úsh magnıttiń barlyǵy alyndy. Zaqymdanǵan tinder kesilip, tigilip qalpyna keltirildi. Qursaq qýysyna sanatsııa jasalyp, drenaj qoıyldy. Ota sátti aıaqtaldy. Júrgizilgen emnen keıin balanyń jaǵdaıy jaqsardy. Aýrýhanadan shyǵarylǵan kezde onyń jalpy jaǵdaıy qanaǵattanarlyq boldy, operatsııadan keıingi jaralarda qabyný belgileri baıqalmady, — dedi hırýrg.
Almatydaǵy № 2 BQKA dırektory Marat Rabandııarov bul jaǵdaı balalar úshin shaǵyn magnıtti oıynshyqtardyń qanshalyqty qaýipti ekenin taǵy bir márte kórsetkenin atap ótti.
— Birneshe magnıt jutylǵan jaǵdaıda olar asqazan-ishek jolynyń ártúrli bólikteriniń qabyrǵalary arqyly bir-birine tartylyp, oıyq jaralardyń, tesilýlerdiń, jylankózderdiń, ishek ótimsizdiginiń jáne perıtonıttiń damýyna sebep bolýy múmkin. Sondyqtan ata-analardy balanyń magnıt jutyp qoıǵanyna kúmán týǵan jaǵdaıda dereý medıtsınalyq kómekke júginýge shaqyramyz. Ýaqytyly kórsetilgen kómek aýyr ári ómirge qaýip tóndiretin asqynýlardyń aldyn alýǵa múmkindik beredi, — dep túıindedi Marat Rabandııarov.
Eske salaıyq, buǵan deıin Almatyda eki jasar bala 31 magnıt jutyp qoıǵanyn jazǵanbyz.
