Almatyda BAQ qyzmetkerlerine páter kilti tabystaldy
ALMATY. KAZINFORM – Almaty qalasynda Memleket basshysy Qasym-Jomart Toqaevtyń atynan Buqaralyq aqparat qyzmetkerleri kúnine oraı medıa salasynyń mamandaryna baspana kilti saltanatty túrde tapsyryldy.
Atap aıtqanda, «Qazaqstan», «Habar, «Eýrazııa», «KTK», «Z1 arna» telearnalarynyń, «Qazaq gazetteri» JShS, «Jas Alash», «Vremıa», «Qazaq ádebıeti», «Túrkistan» basylymdarynyń jáne «Shalqar» radıosynyń qyzmetkerlerine, barlyǵy 15 páter berildi.
«Dara» Prezıdenttik bastamalar qory uıymdastyrǵan is-sharaǵa Prezıdent keńesshisi – Baspasóz hatshysy Aıbek Smadııarov arnaıy qatysyp, almatylyq áriptesterdi jańa qonysymen quttyqtady.
– Ózderińiz bilesizder, Prezıdent otandyq jýrnalıstıkanyń damýyna udaıy kóńil bóledi. BAQ qyzmetkerleri kúnine oraı Aqordada ótken saltanatty jıynda Memleket basshysy Qasym-Jomart Toqaev el men ult múddesi úshin qyzmet etip júrgen jýrnalısterdiń eńbegine erekshe toqtalyp ótip: «Sapaly habar taratyp, qajyrly qyzmet etip júrgen aımaq tilshileriniń eńbegin eleýsiz qaldyrýǵa bolmaıdy. Sondyqtan meniń tapsyrmammen osy jyly alǵash ret oblystarda jumys isteıtin jýrnalısterge de páter kilti tabystalady», – dep aıtqan edi. Osy tapsyrmaǵa sáıkes, bıyl almatylyq áriptesterimiz de joba ıgiligin kórip jatyr. Almaty – qazaq baspasóziniń qarashańyraǵy. Kóptegen dástúrli aqparat quraldarynyń tarıhy osy shahardan bastaý alady. Memleket basshysy Almaty qalasynyń tynys-tirshiligin árqashan nazarda ustap otyrady, – dedi Aıbek Smadııarov.
Bıyl BAQ qyzmetkerlerine 66 páter tabystalady. Onyń ishinde Astana qalasynda – 15, Almaty qalasynda – 15, qalǵan 18 aımaqta 2 páterden bólindi.
Baspanaǵa úmitkerlerdi anyqtaý, páterlerdi daıarlaý jumystaryn «Dara» Prezıdenttik bastamalardy qoldaý qory, Prezıdenttiń Іs basqarmasy, jergilikti atqarýshy organdar men BAQ redaktsııalary birlese júrgizdi.
Atap óterlik jaıt, ótken úsh jylda Prezıdent atynan BAQ salasynyń 200 qyzmetkerine baspana berildi.
