Pavlodarda 200-den astam urlanǵan mal ıelerine qaıtaryldy
PAVLODAR. KAZINFORM — Polıtseıler mal semiretin kúzgi mezgilde tórt túlikke ıe bolý kerek ekenin eskertip otyr. Óńir boıynsha qazirgi ýaqytta mal urylaryna qatysty birneshe qylmystyq is qozǵalǵan.
Oblysta «Mal urlaýshy» jedel aldyn alý sharasy nátıjesinde qoldy bolǵan 252 túlik ıelerine qaıtaryldy.
— Qazirgi ýaqytta Maı aýdanynda mal urlyǵyna qatysty eki derek boıynsha sotqa deıingi tergeý amaldary júrgizilip jatyr. Oblystyq prokýratýranyń úılestirýimen júrgizilgen jedel-izdestirý sharalary barysynda polıtsııa qyzmetkerleri 9 kúdiktini anyqtap, ustady. Olardyń úsheýi qamaýǵa alyndy. Aldyn ala derekterge sáıkes, kúdiktiler 2024 jáne 2025 jyldardyń kúz aılarynda aldyn ala sóz baılasyp, jaıylymnan 29 iri qara qarany jáne 7 jylqyny urlaǵan. Keıin olardy bólshektep, etin satyp jibergen. Osylaısha mal ıelerine 18 mıllıon teńgeden astam materıaldyq zalal keltirgen, — dep habarlady Pavlodar oblystyq polıtsııa departamenti krımınaldyq polıtsııa basqarmasynyń bastyǵy Balǵabaı Qaparov.
Jalpy jyl basynan óńir aýmaǵynda 52 mal urlyǵy deregi tirkelgen. Polıtsııa veterınarııalyq qyzmetpen birlesip mal men et ónimderin tasymaldaý boıynsha turaqty tekserister júrgizedi. Mamandar jaıylymdardy, ıesiz maldardy, sondaı-aq saýda oryndaryn, bazarlardy, mal soıý pýnktterin jáne mal men etti tasymaldaıtyn kólik quraldaryn tekseredi.
Eske sala keteıik, elimizde sharýalarǵa tıesili malǵa sáıkestendirý júrgizýdi bekitý normalary qarastyrylyp jatyr.