Almatyda baǵdarsham ýaqytyn kórsetetin tablolar qaıda ketti
ALMATY. KAZINFORM — Almatyda baǵdarshamdar naqty ýaqytqa qaraı beıimdeletin bolady.
Almatylyqtar keı kóshe qıylystarynda ýaqyt kórsetetin baǵdarsham tablosynyń alynyp tastalǵanyn baıqaǵan. Odan bólek turǵyndar baǵdarsham jumysynyń ózgergenin de áleýmettik jelide jazyp jatyr.
Almaty ákimdigi baǵdarsham ýaqytyn kórsetetin qurylǵynyń alynýyna baılanysty túsinikteme berdi. Resmı jaýapqa sáıkes, qazirgi ýaqytta qaladaǵy baǵdarshamdardyń basqarý qurylǵylaryn aýystyrý jumystary júrgizilip jatyr. Bul onyń jumysyn joldaǵy kólik qarqyndylyǵyn eskere otyryp, naqty ýaqyt rejıminde retteý jáne kólik aǵyndarynyń statıstıkalyq derekterin jınaýǵa baǵyttalǵan.
— Keri esepteý tablolarynyń kólik aǵynyna beıimdeletin adaptıvti rejımde jumys isteýin qamtamasyz etý úshin olardyń baǵdarlamasyn jańartý jumystary atqarylyp jatyr. Osyǵan baılanysty atalǵan tablolar ýaqytsha alyndy. Olardyń jumysy 2026 jyldyń qarasha aıynyń sońyna deıin qalpyna keltiriledi, — dep habarlady ákimdikten.
Eske salaıyq, buǵan deıin Almatyda apattyq jóndeý jumystaryna baılanysty kóshe jabyldy.
