Almatyda azyq-túlik baǵasyn ustap turý úshin kásipkerlerge jeńildetilgen nesıe beriledi
ALMATY. KAZINFORM – Almatyda áleýmettik mańyzy bar azyq-túlik taýarlarynyń baǵasyn turaqtandyrý úshin jeńildetilgen nesıege ótinish qabyldaý bastaldy.
«Almaty» áleýmettik-kásipkerlik korporatsııasy kásipkerlerge aınalym qarajatyn tolyqtyrý úshin jyldyq 0,01% mólsherlememen nesıe beredi. Qala ákimdiginiń málimetinshe, qarajatty shıkizat satyp alýǵa, qyzmet aqysyn tóleýge, jalaqy tóleýge jáne logıstıkalyq shyǵyndardy óteýge bolady.
– Qarjylandyrý alǵan óndirýshiler men saýda jelileri áleýmettik mańyzy bar azyq-túlik taýarlarynyń baǵasyn negizsiz ósirmeý jáne kelisilgen merzim ishinde dúken sórelerindegi baǵany turaqty deńgeıde ustap turý jóninde mindetteme alady. Nesıe merzimi – 3 aıdan 3 jylǵa deıin, - delingen habarlamada.
Ótinish 2026 jyly 20 aqpanǵa deıin qabyldanady. Qarjy bólý týraly sheshimdi Almaty ákimdigi janyndaǵy áleýmettik mańyzy bar azyq-túlik taýarlary baǵasyn turaqtandyrý tetikterin iske asyrý jónindegi komıssııa qabyldaıdy.
Kásipkerler jeńildetilgen nesıelerdiń sharttarymen «Almaty» ÁKK-niń resmı saıtynda tanysa alady. https://spkalmaty.kz/
Eske salaıyq, buǵan deıin Úkimette Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken jıynda áleýmettik mańyzy bar azyq-túlik taýarlary baǵasynyń bir aptadaǵy jaǵdaıy qaralǵan edi.