Almatyda azyq-túlik baǵasyn negizsiz kótergen kásipkerlerge 80 mln astam aıyppul salyndy
ALMATY. KAZINFORM — Almatyda saýda salasynda, onyń ishinde azyq-túlik baǵasyna ústeme qosýǵa baılanysty 2003 zań buzý anyqtaldy.
Almaty ákimdiginiń málimetinshe, áleýmettik mańyzy bar azyq-túlik taýarlarynyń baǵasyn turaqtandyrý jáne onyń negizsiz ósýine jol bermeý maqsatynda qalada keshendi sharalardy turaqty túrde júrgizilip keledi.
Onyń nátıjesinde bıyl áleýmettik mańyzy bar azyq-túlik taýarlaryna belgilengen saýda ústemesiniń shekti mólsherinen asyrý jáne saýda qyzmetin retteý salasyndaǵy zańnamanyń ózge de talaptaryn buzý faktileri 2003 ákimshilik hattama toltyrylǵan. Kásipkerlik nysandaryna salynǵan aıyppul somasy 82 mln teńgeden asady.
— Azyq-túlik taýarlarynyń baǵasyn qalyptastyrýdyń barlyq kezeńindegi deldaldyq shemalardy anyqtaý jónindegi óńirlik komıssııanyń otyrystary turaqty túrde ótkiziledi. Komıssııa jumysy aıasynda iri saýda nysandarynda, saýda jelilerinde, sýpermarketterde, bazarlarda jáne úı mańyndaǵy dúkenderde saýda qyzmeti salasyndaǵy zańnama talaptarynyń saqtalýyna júıeli túrde monıtorıng júrgizilip, taldaý jasalady, — dep habarlady ákimdikten.
Sonymen qatar áleýmettik mańyzy bar azyq-túlik taýarlaryna belgilengen saýda ústemesiniń shekti mólsherin saqtaý máselesine erekshe nazar aýdarylatyny atap ótildi.
Eske salaıyq, buǵan deıin Qazaqstanda qandaı azyq-túlik arzandap, qaısysy qymbattaǵanyn jazǵanbyz.
