Almatyda ajyrasqandardyń sany 40 paıyzǵa artqan

ALMATY. KAZINFORM – Ádilet departamenti Almaty qalasynyń Óńirlik kommýnıkatsııalar qyzmetiniń alańynda 2025 jyldyń birinshi jartyjyldyǵynyń qorytyndysyn jarııalady. 

Almaty qalasy ádilet departamentiniń málimetinshe, 2024 jyldyń 6 aıymen salystyrǵanda bıyl jarty jylda týý deńgeıi 4,08%-ǵa ósip, 25 718 týý aktisi tirkelgen. Ólim kórsetkishi kerisinshe 10,2%-ǵa tómendegen. 

Nekege turý 3,8%-ǵa sál azaıǵan: 2025 jyly – 9 274 neke, 2024 jyly – 9 627 neke. Ajyrasqandardyń sany aıtarlyqtaı ósip, 41,6%-ǵa kóbeıgen. Barlyǵy 2 384 ajyrasý aktisi tirkeldi.

Sonymen qatar ádilet departamenti alıment tóleýden qashqandardyń sany da edáýir óskenin málimdedi.

– Bıyl 209 boryshker jaýapqa tartyldy, ótken jyly olardyń sany 61 bolǵan. Alıment boıynsha bereshegi bar boryshkerlerge qatysty Qazaqstan Respýblıkasynan tys jerlerge ýaqytsha shyǵýǵa shekteý qoıý týraly 4 910 qaýly shyǵarylǵan. Alty aı ishinde jeke sot oryndaýshylary alıment alýshylardyń paıdasyna 600 mıllıon teńgeden astam qarajat óndirdi, - dep habarlady departamentten. 

Sondaı-aq qaryzdy óteý úshin alıment boıynsha boryshkerlerden alynǵan 6 avtokólik pen 11 jyljymaıtyn múlik nysany satyldy. 

Eske salaıyq, buǵan deıin sot oryndaýshylar jarty jylda 18 mlrd teńgeden astam alıment óndirgenin jazǵanbyz.