Almatyda Ázerbaıjan men Armenııa syrtqy ister mınıstrleriniń kelissózi aıaqtaldy
ALMATY. KAZINFORM – Almatyda Ázerbaıjan men Armenııa respýblıkasynyń syrtqy ister mınıstrleri Djeıhýn Baıramov pen Ararat Mırzoıan arasyndaǵy kelissóz aıaqtaldy. Eki tarap ashyq máseleler boıynsha kelissózderdi jalǵastyrýǵa ýaǵdalasty. Bul týraly Ázerbaıjan men Armenııa syrtqy ister mınıstrlikteri habarlady.
Dıplomattar Almaty Dostyq úıinde ótken kelissóz eki memleket arasynda beıbitshilik ornatý týraly ekijaqty kelisim jobasyn talqylaýǵa kómekteskenin atap ótti.
«Mınıstrler men olardyń delegatsııalary Ázirbaıjan men Armenııa arasyndaǵy beıbitshilik pen memleketaralyq qatynastardy ornatý týraly ekijaqty kelisim jobasynyń erejelerin talqylady. Taraptar áli de kelisilmegen máseleler boıynsha kelissózdi jalǵastyrýǵa kelisti», - delingen Ázirbaıjan SІM málimdemesinde.
Mınıstrler delımıtatsııa boıynsha ilgerileýdi, sondaı-aq osy baǵytta qol jetkizilgen kelisimderdi quptady.
«Sapar barysynda mınıstrler Qazaqstan premer-mınıstriniń orynbasary, syrtqy ister mınıstri Murat Nurtileýmen jeke jáne úshjaqty formatta kezdesti», - delingen habarlamada.
Eki memlekettiń syrtqy ister vedomstvolarynyń basshylary Djeıhýn Baıramov pen Ararat Mırzoıan kelissóz alańyn usynǵan Qazaqstanǵa alǵys bildirdi.
Eske salaıyq, 10 mamyr kúni Ázerbaıjan men Armenııanyń cyrtqy ister mınıstrleri kelissóz júrgizýge Almatyǵa kelgen bolatyn.
Aıta keteıik, sáýir aıynda Erevanda ótken kelissózder barysynda Qazaqstan Prezıdenti Qasym-Jomart Toqaev pen Armenııa Premer-mınıstri Nıkol Pashınıan Ońtústik Kavkazda turaqtylyq pen qaýipsizdikti qamtamasyz etý máselesine aıryqsha nazar aýdarǵan bolatyn.
Sondaı-aq Memleket basshysy bul kezdesý ázerbaıjan-armıan ýaǵdalastyǵynyń naqty júzege asýyna jol ashyp, jýyq arada Ońtústik Kavkazda turaqty ári uzaqmerzimdi beıbitshiliktiń ornaýyna yqpal etetinin aıtqan edi.
Buǵan deıin Qazaqstan kelissóz ótkizý úshin alań usyný arqyly járdem kórsetýge daıyn ekenin málimdegen.
