Almatyda «Azaly tarıhqa aıryqsha taǵzym» kórmesi ashyldy
ALMATY. KAZINFORM - Almaty mýzeıinde Saıası qýǵyn-súrgin jáne asharshylyq qurbandaryn eske alý kúni jáne kórnekti memleket qaıratkeri Turar Rysqulovtyń, belgili jazýshylar, qazaqtyń úsh báıteregi – Sáken Seıfýllınniń, Іlııas Jansúgirovtiń, Beıimbet Maılınniń týǵanyna 130 jyl tolýyna oraı «Azaly tarıhqa aıryqsha taǵzym» atty kórmeniń ashylýy ótti.
«31 mamyr – qazaqtyń basyna túsken úlken oırandardan qaza bolǵan, qurban bolǵan azamattarymyzdy eske alý kúni. Qasiret kúni dep aıtýǵa da bolady. Sondyqtan 1993 jyly Qazaqstannyń birinshi Prezıdenti N.Nazarbaevtyń jarlyǵymen Saıası qýǵyn-súrgin jáne asharshylyq qurbandaryn eske alý kúni retinde belgilengen. Sodan beri atalyp, ótip kele jatyr. Respýblıka kóleminde, basqa jerlerde de ótip jatady, biraq sonyń ishinde Almatynyń orny men úshin erekshe. Búgin Almaty mýzeıi 31 mamyrǵa oraı kórme uıymdastyryp otyr eken. Bul bizdiń bolashaǵymyzdy bastaıtyn urpaqtarymyzǵa kerek. Murajaıǵa kelgen jastar múlde basqa sabaq alady. Qazaqtyń qasiretin kórgen kezde olardyń boıynda ultjandylyq oıanady», - dedi Respýblıkalyq Saıası qýǵyn-súrginge ushyraǵandar qaýymdastyǵynyń tóraǵasy Jumabek Ashýuly
Kórmede mýzeı qoryndaǵy fotosýretter, muraǵattyq qujattar, sol jyldarǵa tán zattaı aıǵaqtar, kórnekti memleket qaıratkeri Turar Rysqulovtyń, Temirbek Júrgenovtiń, belgili jazýshylar Sáken Seıfýllınniń, Іlııas Jansúgirovtiń, Beıimbet Maılınniń t.b. tergeý isi qujattary men Mansur Ǵataýlınniń kilemshesi, penaly, Sultanbek Qojanovtyń qoıyn dápteri, Yqylas Kareneevtiń jeke móri men ALJIR-de otyrǵan áıelderdiń qoldan jasaǵan tasbıyǵy jáne olardyń balalaryna arnap toqyǵan keste buıymdary qoıylǵan.
«Oqý baǵdarlamarynda, mektep pen ýnıversıtetterde aýyzsha aıtý bólek, ult qaıratkerleriniń eńbegin osyndaı kórmelerden kórgen bólek bolady. Sondyqtan mundaı kórmelerdiń maqsaty – sanaly urpaq tárbıeleý. Óıtkeni olar arhıv qujattaryn kóredi. Zııalylar qoldanǵan zattary kórgende kez kelgen adam beıjaı qalmaıdy. Japonııa, Ońtústik Koreıa, Qytaıda oqýshylar men stýdentter óz eliniń tarıhyna qatysty kórmelerge kelip turady, bul mindettelgen. Bizde osyndaı mádenıetke qol jetkizýimiz kerek», - dedi Baýyrjan Imanǵalıev.
Kórme 14 maýsymǵa deıin jalǵasady.
