Almatyda Aıýsaı sarqyramasy mańynda adasyp ketken balalar qutqaryldy
ALMATY. KAZINFORM – Almaty qalasynyń Bostandyq aýdanyndaǵy Aıýsaı sarqyramasy mańynda týrıstik soqpaqtan adasyp ketken 2014 jyly týǵan balalarǵa qutqarýshylar kómek kórsetti.
Almaty qalasynyń Monıtorıng jáne jedel áreket etý ortalyǵynyń qutqarýshylary ózdiginen taýdan tómen túse almaǵan balalardy izdep taýyp, «Aıýsaı» vızıt-ortalyǵyna deıin ertip bardy.
Balalar sol jerde ata-analaryna tapsyryldy. Olarǵa medıtsınalyq kómek qajet bolǵan joq.
– Taýǵa shyǵar aldynda baǵytty aldyn ala josparlap, aýa raıy jaǵdaıyn jáne kúnniń batý ýaqytyn eskerińiz. Týrıstik soqpaqtardan shyqpańyz jáne óz kúshińizdi durys baǵalańyz, – dep eskertti Tótenshe jaǵdaılar mınıstrligi.
Aıta keteıik, buǵan deıin Almatynyń Býtakov sarqyramasy mańynda 2400 metrden astam bıiktikte adasyp ketken tórt adamdy qutqarýshylar qaýipsiz jerge alyp túsken bolatyn.
